వసిష్వా హి మియేధ్య వస్త్రాణ్య్ ఊర్జామ్ పతే |
సేమం నో అధ్వరం యజ || 1-026-01
ని నో హోతా వరేణ్యః సదా యవిష్ఠ మన్మభిః |
అగ్నే దివిత్మతా వచః || 1-026-02
ఆ హి ష్మా సూనవే పితాపిర్ యజత్య్ ఆపయే |
సఖా సఖ్యే వరేణ్యః || 1-026-03
ఆ నో బర్హీ రిశాదసో వరుణో మిత్రో అర్యమా |
సీదన్తు మనుషో యథా || 1-026-04
పూర్వ్య హోతర్ అస్య నో మన్దస్వ సఖ్యస్య చ |
ఇమా ఉ షు శ్రుధీ గిరః || 1-026-05
యచ్ చిద్ ధి శశ్వతా తనా దేవం-దేవం యజామహే |
త్వే ఇద్ ధూయతే హవిః || 1-026-06
ప్రియో నో అస్తు విశ్పతిర్ హోతా మన్ద్రో వరేణ్యః |
ప్రియాః స్వగ్నయో వయమ్ || 1-026-07
స్వగ్నయో హి వార్యం దేవాసో దధిరే చ నః |
స్వగ్నయో మనామహే || 1-026-08
అథా న ఉభయేషామ్ అమృత మర్త్యానామ్ |
మిథః సన్తు ప్రశస్తయః || 1-026-09
విశ్వేభిర్ అగ్నే అగ్నిభిర్ ఇమం యజ్ఞమ్ ఇదం వచః |
చనో ధాః సహసో యహో || 1-026-10
