యచ్ చిద్ ధి తే విశో యథా ప్ర దేవ వరుణ వ్రతమ్ |
మినీమసి ద్యవి-ద్యవి || 1-025-01
మా నో వధాయ హత్నవే జిహీళానస్య రీరధః |
మా హృణానస్య మన్యవే || 1-025-02
వి మృళీకాయ తే మనో రథీర్ అశ్వం న సందితమ్ |
గీర్భిర్ వరుణ సీమహి || 1-025-03
పరా హి మే విమన్యవః పతన్తి వస్యऽష్టయే |
వయో న వసతీర్ ఉప || 1-025-04
కదా క్షత్రశ్రియం నరమ్ ఆ వరుణం కరామహే |
మృళీకాయోరుచక్షసమ్ || 1-025-05
తద్ ఇత్ సమానమ్ ఆశాతే వేనన్తా న ప్ర యుచ్ఛతః |
ధృతవ్రతాయ దాశుషే || 1-025-06
వేదా యో వీనామ్ పదమ్ అన్తరిక్షేణ పతతామ్ |
వేద నావః సముద్రియః || 1-025-07
వేద మాసో ధృతవ్రతో ద్వాదశ ప్రజావతః |
వేదా య ఉపజాయతే || 1-025-08
వేద వాతస్య వర్తనిమ్ ఉరోర్ ఋష్వస్య బృహతః |
వేదా యే అధ్యాసతే || 1-025-09
ని షసాద ధృతవ్రతో వరుణః పస్త్యాస్వ్ ఆ |
సామ్రాజ్యాయ సుక్రతుః || 1-025-10
అతో విశ్వాన్య్ అద్భుతా చికిత్వాఅభి పశ్యతి |
కృతాని యా చ కర్త్వా || 1-025-11
స నో విశ్వాహా సుక్రతుర్ ఆదిత్యః సుపథా కరత్ |
ప్ర ణ ఆయూంషి తారిషత్ || 1-025-12
బిభ్రద్ ద్రాపిం హిరణ్యయం వరుణో వస్త నిర్ణిజమ్ |
పరి స్పశో ని షేదిరే || 1-025-13
న యం దిప్సన్తి దిప్సవో న ద్రుహ్వాణో జనానామ్ |
న దేవమ్ అభిమాతయః || 1-025-14
ఉత యో మానుషేష్వ్ ఆ యశశ్ చక్రే అసామ్య్ ఆ |
అస్మాకమ్ ఉదరేష్వ్ ఆ || 1-025-15
పరా మే యన్తి ధీతయో గావో న గవ్యూతీర్ అను |
ఇచ్ఛన్తీర్ ఉరుచక్షసమ్ || 1-025-16
సం ను వోచావహై పునర్ యతో మే మధ్వ్ ఆభృతమ్ |
హోతేవ క్షదసే ప్రియమ్ || 1-025-17
దర్శం ను విశ్వదర్శతం దర్శం రథమ్ అధి క్షమి |
ఏతా జుషత మే గిరః || 1-025-18
ఇమమ్ మే వరుణ శ్రుధీ హవమ్ అద్యా చ మృళయ |
త్వామ్ అవస్యుర్ ఆ చకే || 1-025-19
త్వం విశ్వస్య మేధిర దివశ్ చ గ్మశ్ చ రాజసి |
స యామని ప్రతి శ్రుధి || 1-025-20
ఉద్ ఉత్తమమ్ ముముగ్ధి నో వి పాశమ్ మధ్యమం చృత |
అవాధమాని జీవసే || 1-025-21
