తీవ్రాః సోమాస ఆ గహ్య్ ఆశీర్వన్తః సుతా ఇమే |
వాయో తాన్ ప్రస్థితాన్ పిబ || 1-023-01
ఉభా దేవా దివిస్పృశేన్ద్రవాయూ హవామహే |
అస్య సోమస్య పీతయే || 1-023-02
ఇన్ద్రవాయూ మనోజువా విప్రా హవన్త ఊతయే |
సహస్రాక్షా ధియస్ పతీ || 1-023-03
మిత్రం వయం హవామహే వరుణం సోమపీతయే |
జజ్ఞానా పూతదక్షసా || 1-023-04
ఋతేన యావ్ ఋతావృధావ్ ఋతస్య జ్యోతిషస్ పతీ |
తా మిత్రావరుణా హువే || 1-023-05
వరుణః ప్రావితా భువన్ మిత్రో విశ్వాభిర్ ఊతిభిః |
కరతాం నః సురాధసః || 1-023-06
మరుత్వన్తం హవామహ ఇన్ద్రమ్ ఆ సోమపీతయే |
సజూర్ గణేన తృమ్పతు || 1-023-07
ఇన్ద్రజ్యేష్ఠా మరుద్గణా దేవాసః పూషరాతయః |
విశ్వే మమ శ్రుతా హవమ్ || 1-023-08
హత వృత్రం సుదానవ ఇన్ద్రేణ సహసా యుజా |
మా నో దుఃశంస ఈశత || 1-023-09
విశ్వాన్ దేవాన్ హవామహే మరుతః సోమపీతయే |
ఉగ్రా హి పృశ్నిమాతరః || 1-023-10
జయతామ్ ఇవ తన్యతుర్ మరుతామ్ ఏతి ధృష్ణుయా |
యచ్ ఛుభం యాథనా నరః || 1-023-11
హస్కారాద్ విద్యుతస్ పర్య్ అతో జాతా అవన్తు నః |
మరుతో మృళయన్తు నః || 1-023-12
ఆ పూషఞ్ చిత్రబర్హిషమ్ ఆఘృణే ధరుణం దివః |
ఆజా నష్టం యథా పశుమ్ || 1-023-13
పూషా రాజానమ్ ఆఘృణిర్ అపగూళ్హం గుహా హితమ్ |
అవిన్దచ్ చిత్రబర్హిషమ్ || 1-023-14
ఉతో స మహ్యమ్ ఇన్దుభిః షడ్ యుక్తాఅనుసేషిధత్ |
గోభిర్ యవం న చర్కృషత్ || 1-023-15
అమ్బయో యన్త్య్ అధ్వభిర్ జామయో అధ్వరీయతామ్ |
పృఞ్చతీర్ మధునా పయః || 1-023-16
అమూర్ యా ఉప సూర్యే యాభిర్ వా సూర్యః సహ |
తా నో హిన్వన్త్వ్ అధ్వరమ్ || 1-023-17
అపో దేవీర్ ఉప హ్వయే యత్ర గావః పిబన్తి నః |
సిన్ధుభ్యః కర్త్వం హవిః || 1-023-18
అప్స్వ్ అన్తర్ అమృతమ్ అప్సు భేషజమ్ అపామ్ ఉత ప్రశస్తయే |
దేవా భవత వాజినః || 1-023-19
అప్సు మే సోమో అబ్రవీద్ అన్తర్ విశ్వాని భేషజా |
అగ్నిం చ విశ్వశమ్భువమ్ ఆపశ్ చ విశ్వభేషజీః || 1-023-20
ఆపః పృణీత భేషజం వరూథం తన్వే మమ |
జ్యోక్ చ సూర్యం దృశే || 1-023-21
ఇదమ్ ఆపః ప్ర వహత యత్ కిం చ దురితమ్ మయి |
యద్ వాహమ్ అభిదుద్రోహ యద్ వా శేప ఉతానృతమ్ || 1-023-22
ఆపో అద్యాన్వ్ అచారిషం రసేన సమ్ అగస్మహి |
పయస్వాన్ అగ్న ఆ గహి తమ్ మా సం సృజ వర్చసా || 1-023-23
సమ్ మాగ్నే వర్చసా సృజ సమ్ ప్రజయా సమ్ ఆయుషా |
విద్యుర్ మే అస్య దేవా ఇన్ద్రో విద్యాత్ సహ ఋషిభిః || 1-023-24
