ఆ న ఇళాభిర్ విదథే సుశస్తి విశ్వానరః సవితా దేవ ఏతు |
అపి యథా యువానో మత్సథా నో విశ్వం జగద్ అభిపిత్వే మనీషా || 1-186-01
ఆ నో విశ్వ ఆస్క్రా గమన్తు దేవా మిత్రో అర్యమా వరుణః సజోషాః |
భువన్ యథా నో విశ్వే వృధాసః కరన్ సుషాహా విథురం న శవః || 1-186-02
ప్రేష్ఠం వో అతిథిం గృణీషే ऽగ్నిం శస్తిభిస్ తుర్వణిః సజోషాః |
అసద్ యథా నో వరుణః సుకీర్తిర్ ఇషశ్ చ పర్షద్ అరిగూర్తః సూరిః || 1-186-03
ఉప వ ఏషే నమసా జిగీషోషాసానక్తా సుదుఘేవ ధేనుః |
సమానే అహన్ విమిమానో అర్కం విషురూపే పయసి సస్మిన్న్ ఊధన్ || 1-186-04
ఉత నో ऽహిర్ బుధ్న్యో మయస్ కః శిశుం న పిప్యుషీవ వేతి సిన్ధుః |
యేన నపాతమ్ అపాం జునామ మనోజువో వృషణో యం వహన్తి || 1-186-05
ఉత న ఈం త్వష్టా గన్త్వ్ అచ్ఛా స్మత్ సూరిభిర్ అభిపిత్వే సజోషాః |
ఆ వృత్రహేన్ద్రశ్ చర్షణిప్రాస్ తువిష్టమో నరాం న ఇహ గమ్యాః || 1-186-06
ఉత న ఈమ్ మతయో ऽశ్వయోగాః శిశుం న గావస్ తరుణం రిహన్తి |
తమ్ ఈం గిరో జనయో న పత్నీః సురభిష్టమం నరాం నసన్త || 1-186-07
ఉత న ఈమ్ మరుతో వృద్ధసేనాః స్మద్ రోదసీ సమనసః సదన్తు |
పృషదశ్వాసో ऽవనయో న రథా రిశాదసో మిత్రయుజో న దేవాః || 1-186-08
ప్ర ను యద్ ఏషామ్ మహినా చికిత్రే ప్ర యుఞ్జతే ప్రయుజస్ తే సువృక్తి |
అధ యద్ ఏషాం సుదినే న శరుర్ విశ్వమ్ ఏరిణమ్ ప్రుషాయన్త సేనాః || 1-186-09
ప్రో అశ్వినావ్ అవసే కృణుధ్వమ్ ప్ర పూషణం స్వతవసో హి సన్తి |
అద్వేషో విష్ణుర్ వాత ఋభుక్షా అచ్ఛా సుమ్నాయ వవృతీయ దేవాన్ || 1-186-10
ఇయం సా వో అస్మే దీధితిర్ యజత్రా అపిప్రాణీ చ సదనీ చ భూయాః |
ని యా దేవేషు యతతే వసూయుర్ విద్యామేషం వృజనం జీరదానుమ్ || 1-186-11
