కతరా పూర్వా కతరాపరాయోః కథా జాతే కవయః కో వి వేద |
విశ్వం త్మనా బిభృతో యద్ ధ నామ వి వర్తేతే అహనీ చక్రియేవ || 1-185-01
భూరిం ద్వే అచరన్తీ చరన్తమ్ పద్వన్తం గర్భమ్ అపదీ దధాతే |
నిత్యం న సూనుమ్ పిత్రోర్ ఉపస్థే ద్యావా రక్షతమ్ పృథివీ నో అభ్వాత్ || 1-185-02
అనేహో దాత్రమ్ అదితేర్ అనర్వం హువే స్వర్వద్ అవధం నమస్వత్ |
తద్ రోదసీ జనయతం జరిత్రే ద్యావా రక్షతమ్ పృథివీ నో అభ్వాత్ || 1-185-03
అతప్యమానే అవసావన్తీ అను ష్యామ రోదసీ దేవపుత్రే |
ఉభే దేవానామ్ ఉభయేభిర్ అహ్నాం ద్యావా రక్షతమ్ పృథివీ నో అభ్వాత్ || 1-185-04
సంగచ్ఛమానే యువతీ సమన్తే స్వసారా జామీ పిత్రోర్ ఉపస్థే |
అభిజిఘ్రన్తీ భువనస్య నాభిం ద్యావా రక్షతమ్ పృథివీ నో అభ్వాత్ || 1-185-05
ఉర్వీ సద్మనీ బృహతీ ఋతేన హువే దేవానామ్ అవసా జనిత్రీ |
దధాతే యే అమృతం సుప్రతీకే ద్యావా రక్షతమ్ పృథివీ నో అభ్వాత్ || 1-185-06
ఉర్వీ పృథ్వీ బహులే దూరేన్తే ఉప బ్రువే నమసా యజ్ఞే అస్మిన్ |
దధాతే యే సుభగే సుప్రతూర్తీ ద్యావా రక్షతమ్ పృథివీ నో అభ్వాత్ || 1-185-07
దేవాన్ వా యచ్ చకృమా కచ్ చిద్ ఆగః సఖాయం వా సదమ్ ఇజ్ జాస్పతిం వా |
ఇయం ధీర్ భూయా అవయానమ్ ఏషాం ద్యావా రక్షతమ్ పృథివీ నో అభ్వాత్ || 1-185-08
ఉభా శంసా నర్యా మామ్ అవిష్టామ్ ఉభే మామ్ ఊతీ అవసా సచేతామ్ |
భూరి చిద్ అర్యః సుదాస్తరాయేషా మదన్త ఇషయేమ దేవాః || 1-185-09
ఋతం దివే తద్ అవోచమ్ పృథివ్యా అభిశ్రావాయ ప్రథమం సుమేధాః |
పాతామ్ అవద్యాద్ దురితాద్ అభీకే పితా మాతా చ రక్షతామ్ అవోభిః || 1-185-10
ఇదం ద్యావాపృథివీ సత్యమ్ అస్తు పితర్ మాతర్ యద్ ఇహోపబ్రువే వామ్ |
భూతం దేవానామ్ అవమే అవోభిర్ విద్యామేషం వృజనం జీరదానుమ్ || 1-185-11
