సోమానం స్వరణం కృణుహి బ్రహ్మణస్ పతే |
కక్షీవన్తం య ఔశిజః || 1-018-01
యో రేవాన్ యో అమీవహా వసువిత్ పుష్టివర్ధనః |
స నః సిషక్తు యస్ తురః || 1-018-02
మా నః శంసో అరరుషో ధూర్తిః ప్రణఙ్ మర్త్యస్య |
రక్షా ణో బ్రహ్మణస్ పతే || 1-018-03
స ఘా వీరో న రిష్యతి యమ్ ఇన్ద్రో బ్రహ్మణస్ పతిః |
సోమో హినోతి మర్త్యమ్ || 1-018-04
త్వం తమ్ బ్రహ్మణస్ పతే సోమ ఇన్ద్రశ్ చ మర్త్యమ్ |
దక్షిణా పాత్వ్ అంహసః || 1-018-05
సదసస్ పతిమ్ అద్భుతమ్ ప్రియమ్ ఇన్ద్రస్య కామ్యమ్ |
సనిమ్ మేధామ్ అయాసిషమ్ || 1-018-06
యస్మాద్ ఋతే న సిధ్యతి యజ్ఞో విపశ్చితశ్ చన |
స ధీనాం యోగమ్ ఇన్వతి || 1-018-07
ఆద్ ఋధ్నోతి హవిష్కృతిమ్ ప్రాఞ్చం కృణోత్య్ అధ్వరమ్ |
హోత్రా దేవేషు గచ్ఛతి || 1-018-08
నరాశంసం సుధృష్టమమ్ అపశ్యం సప్రథస్తమమ్ |
దివో న సద్మమఖసమ్ || 1-018-09
