ఆ త్వా వహన్తు హరయో వృషణం సోమపీతయే |
ఇన్ద్ర త్వా సూరచక్షసః || 1-016-01
ఇమా ధానా ఘృతస్నువో హరీ ఇహోప వక్షతః |
ఇన్ద్రం సుఖతమే రథే || 1-016-02
ఇన్ద్రమ్ ప్రాతర్ హవామహ ఇన్ద్రమ్ ప్రయత్య్ అధ్వరే |
ఇన్ద్రం సోమస్య పీతయే || 1-016-03
ఉప నః సుతమ్ ఆ గహి హరిభిర్ ఇన్ద్ర కేశిభిః |
సుతే హి త్వా హవామహే || 1-016-04
సేమం న స్తోమమ్ ఆ గహ్య్ ఉపేదం సవనం సుతమ్ |
గౌరో న తృషితః పిబ || 1-016-05
ఇమే సోమాస ఇన్దవః సుతాసో అధి బర్హిషి |
తాఇన్ద్ర సహసే పిబ || 1-016-06
అయం తే స్తోమో అగ్రియో హృదిస్పృగ్ అస్తు శంతమః |
అథా సోమం సుతమ్ పిబ || 1-016-07
విశ్వమ్ ఇత్ సవనం సుతమ్ ఇన్ద్రో మదాయ గచ్ఛతి |
వృత్రహా సోమపీతయే || 1-016-08
సేమం నః కామమ్ ఆ పృణ గోభిర్ అశ్వైః శతక్రతో |
స్తవామ త్వా స్వాధ్యః || 1-016-09
