ప్రాతా రత్నమ్ ప్రాతరిత్వా దధాతి తం చికిత్వాన్ ప్రతిగృహ్యా ని ధత్తే |
తేన ప్రజాం వర్ధయమాన ఆయూ రాయస్ పోషేణ సచతే సువీరః || 1-125-01
సుగుర్ అసత్ సుహిరణ్యః స్వశ్వో బృహద్ అస్మై వయ ఇన్ద్రో దధాతి |
యస్ త్వాయన్తం వసునా ప్రాతరిత్వో ముక్షీజయేవ పదిమ్ ఉత్సినాతి || 1-125-02
ఆయమ్ అద్య సుకృతమ్ ప్రాతర్ ఇచ్ఛన్న్ ఇష్టేః పుత్రం వసుమతా రథేన |
అంశోః సుతమ్ పాయయ మత్సరస్య క్షయద్వీరం వర్ధయ సూనృతాభిః || 1-125-03
ఉప క్షరన్తి సిన్ధవో మయోభువ ఈజానం చ యక్ష్యమాణం చ ధేనవః |
పృణన్తం చ పపురిం చ శ్రవస్యవో ఘృతస్య ధారా ఉప యన్తి విశ్వతః || 1-125-04
నాకస్య పృష్ఠే అధి తిష్ఠతి శ్రితో యః పృణాతి స హ దేవేషు గచ్ఛతి |
తస్మా ఆపో ఘృతమ్ అర్షన్తి సిన్ధవస్ తస్మా ఇయం దక్షిణా పిన్వతే సదా || 1-125-05
దక్షిణావతామ్ ఇద్ ఇమాని చిత్రా దక్షిణావతాం దివి సూర్యాసః |
దక్షిణావన్తో అమృతమ్ భజన్తే దక్షిణావన్తః ప్ర తిరన్త ఆయుః || 1-125-06
మా పృణన్తో దురితమ్ ఏన ఆరన్ మా జారిషుః సూరయః సువ్రతాసః |
అన్యస్ తేషామ్ పరిధిర్ అస్తు కశ్ చిద్ అపృణన్తమ్ అభి సం యన్తు శోకాః || 1-125-07
