ఆ వాం రథో అశ్వినా శ్యేనపత్వా సుమృళీకః స్వవాయాత్వ్ అర్వాఙ్ |
యో మర్త్యస్య మనసో జవీయాన్ త్రివన్ధురో వృషణా వాతరంహాః || 1-118-01
త్రివన్ధురేణ త్రివృతా రథేన త్రిచక్రేణ సువృతా యాతమ్ అర్వాక్ |
పిన్వతం గా జిన్వతమ్ అర్వతో నో వర్ధయతమ్ అశ్వినా వీరమ్ అస్మే || 1-118-02
ప్రవద్యామనా సువృతా రథేన దస్రావ్ ఇమం శృణుతం శ్లోకమ్ అద్రేః |
కిమ్ అఙ్గ వామ్ ప్రత్య్ అవర్తిం గమిష్ఠాహుర్ విప్రాసో అశ్వినా పురాజాః || 1-118-03
ఆ వాం శ్యేనాసో అశ్వినా వహన్తు రథే యుక్తాస ఆశవః పతంగాః |
యే అప్తురో దివ్యాసో న గృధ్రా అభి ప్రయో నాసత్యా వహన్తి || 1-118-04
ఆ వాం రథం యువతిస్ తిష్ఠద్ అత్ర జుష్ట్వీ నరా దుహితా సూర్యస్య |
పరి వామ్ అశ్వా వపుషః పతంగా వయో వహన్త్వ్ అరుషా అభీకే || 1-118-05
ఉద్ వన్దనమ్ ఐరతం దంసనాభిర్ ఉద్ రేభం దస్రా వృషణా శచీభిః |
నిష్ టౌగ్ర్యమ్ పారయథః సముద్రాత్ పునశ్ చ్యవానం చక్రథుర్ యువానమ్ || 1-118-06
యువమ్ అత్రయే ऽవనీతాయ తప్తమ్ ఊర్జమ్ ఓమానమ్ అశ్వినావ్ అధత్తమ్ |
యువం కణ్వాయాపిరిప్తాయ చక్షుః ప్రత్య్ అధత్తం సుష్టుతిం జుజుషాణా || 1-118-07
యువం ధేనుం శయవే నాధితాయాపిన్వతమ్ అశ్వినా పూర్వ్యాయ |
అముఞ్చతం వర్తికామ్ అంహసో నిః ప్రతి జఙ్ఘాం విశ్పలాయా అధత్తమ్ || 1-118-08
యువం శ్వేతమ్ పేదవ ఇన్ద్రజూతమ్ అహిహనమ్ అశ్వినాదత్తమ్ అశ్వమ్ |
జోహూత్రమ్ అర్యో అభిభూతిమ్ ఉగ్రం సహస్రసాం వృషణం వీడ్వఙ్గమ్ || 1-118-09
తా వాం నరా స్వ్ అవసే సుజాతా హవామహే అశ్వినా నాధమానాః |
ఆ న ఉప వసుమతా రథేన గిరో జుషాణా సువితాయ యాతమ్ || 1-118-10
ఆ శ్యేనస్య జవసా నూతనేనాస్మే యాతం నాసత్యా సజోషాః |
హవే హి వామ్ అశ్వినా రాతహవ్యః శశ్వత్తమాయా ఉషసో వ్యుష్టౌ || 1-118-11
