ఇన్ద్రం విశ్వా అవీవృధన్ సముద్రవ్యచసం గిరః |
రథీతమం రథీనాం వాజానాం సత్పతిమ్ పతిమ్ || 1-011-01
సఖ్యే త ఇన్ద్ర వాజినో మా భేమ శవసస్ పతే |
త్వామ్ అభి ప్ర ణోనుమో జేతారమ్ అపరాజితమ్ || 1-011-02
పూర్వీర్ ఇన్ద్రస్య రాతయో న వి దస్యన్త్య్ ఊతయః |
యదీ వాజస్య గోమత స్తోతృభ్యో మంహతే మఘమ్ || 1-011-03
పురామ్ భిన్దుర్ యువా కవిర్ అమితౌజా అజాయత |
ఇన్ద్రో విశ్వస్య కర్మణో ధర్తా వజ్రీ పురుష్టుతః || 1-011-04
త్వం వలస్య గోమతో ऽపావర్ అద్రివో బిలమ్ |
త్వాం దేవా అబిభ్యుషస్ తుజ్యమానాస ఆవిషుః || 1-011-05
తవాహం శూర రాతిభిః ప్రత్య్ ఆయం సిన్ధుమ్ ఆవదన్ |
ఉపాతిష్ఠన్త గిర్వణో విదుష్ టే తస్య కారవః || 1-011-06
మాయాభిర్ ఇన్ద్ర మాయినం త్వం శుష్ణమ్ అవాతిరః |
విదుష్ టే తస్య మేధిరాస్ తేషాం శ్రవాంస్య్ ఉత్ తిర || 1-011-07
ఇన్ద్రమ్ ఈశానమ్ ఓజసాభి స్తోమా అనూషత |
సహస్రం యస్య రాతయ ఉత వా సన్తి భూయసీః || 1-011-08
