యా ఓషధీః పూర్వా జాతా దేవేభ్యస్ త్రియుగమ్ పురా |
మనై ను బభ్రూణామ్ అహం శతం ధామాని సప్త చ || 10-097-01
శతం వో అమ్బ ధామాని సహస్రమ్ ఉత వో రుహః |
అధా శతక్రత్వో యూయమ్ ఇమమ్ మే అగదం కృత || 10-097-02
ఓషధీః ప్రతి మోదధ్వమ్ పుష్పవతీః ప్రసూవరీః |
అశ్వా ఇవ సజిత్వరీర్ వీరుధః పారయిష్ణ్వః || 10-097-03
ఓషధీర్ ఇతి మాతరస్ తద్ వో దేవీర్ ఉప బ్రువే |
సనేయమ్ అశ్వం గాం వాస ఆత్మానం తవ పూరుష || 10-097-04
అశ్వత్థే వో నిషదనమ్ పర్ణే వో వసతిష్ కృతా |
గోభాజ ఇత్ కిలాసథ యత్ సనవథ పూరుషమ్ || 10-097-05
యత్రౌషధీః సమగ్మత రాజానః సమితావ్ ఇవ |
విప్రః స ఉచ్యతే భిషగ్ రక్షోహామీవచాతనః || 10-097-06
అశ్వావతీం సోమావతీమ్ ఊర్జయన్తీమ్ ఉదోజసమ్ |
ఆవిత్సి సర్వా ఓషధీర్ అస్మా అరిష్టతాతయే || 10-097-07
ఉచ్ ఛుష్మా ఓషధీనాం గావో గోష్ఠాద్ ఇవేరతే |
ధనం సనిష్యన్తీనామ్ ఆత్మానం తవ పూరుష || 10-097-08
ఇష్కృతిర్ నామ వో మాతాథో యూయం స్థ నిష్కృతీః |
సీరాః పతత్రిణీ స్థన యద్ ఆమయతి నిష్ కృథ || 10-097-09
అతి విశ్వాః పరిష్ఠా స్తేన ఇవ వ్రజమ్ అక్రముః |
ఓషధీః ప్రాచుచ్యవుర్ యత్ కిం చ తన్వో రపః || 10-097-10
యద్ ఇమా వాజయన్న్ అహమ్ ఓషధీర్ హస్త ఆదధే |
ఆత్మా యక్ష్మస్య నశ్యతి పురా జీవగృభో యథా || 10-097-11
యస్యౌషధీః ప్రసర్పథాఙ్గమ్-అఙ్గమ్ పరుష్-పరుః |
తతో యక్ష్మం వి బాధధ్వ ఉగ్రో మధ్యమశీర్ ఇవ || 10-097-12
సాకం యక్ష్మ ప్ర పత చాషేణ కికిదీవినా |
సాకం వాతస్య ధ్రాజ్యా సాకం నశ్య నిహాకయా || 10-097-13
అన్యా వో అన్యామ్ అవత్వ్ అన్యాన్యస్యా ఉపావత |
తాః సర్వాః సంవిదానా ఇదమ్ మే ప్రావతా వచః || 10-097-14
యాః ఫలినీర్ యా అఫలా అపుష్పా యాశ్ చ పుష్పిణీః |
బృహస్పతిప్రసూతాస్ తా నో ముఞ్చన్త్వ్ అంహసః || 10-097-15
ముఞ్చన్తు మా శపథ్యాద్ అథో వరుణ్యాద్ ఉత |
అథో యమస్య పడ్బీశాత్ సర్వస్మాద్ దేవకిల్బిషాత్ || 10-097-16
అవపతన్తీర్ అవదన్ దివ ఓషధయస్ పరి |
యం జీవమ్ అశ్నవామహై న స రిష్యాతి పూరుషః || 10-097-17
యా ఓషధీః సోమరాజ్ఞీర్ బహ్వీః శతవిచక్షణాః |
తాసాం త్వమ్ అస్య్ ఉత్తమారం కామాయ శం హృదే || 10-097-18
యా ఓషధీః సోమరాజ్ఞీర్ విష్ఠితాః పృథివీమ్ అను |
బృహస్పతిప్రసూతా అస్యై సం దత్త వీర్యమ్ || 10-097-19
మా వో రిషత్ ఖనితా యస్మై చాహం ఖనామి వః |
ద్విపచ్ చతుష్పద్ అస్మాకం సర్వమ్ అస్త్వ్ అనాతురమ్ || 10-097-20
యాశ్ చేదమ్ ఉపశృణ్వన్తి యాశ్ చ దూరమ్ పరాగతాః |
సర్వాః సంగత్య వీరుధో ऽస్యై సం దత్త వీర్యమ్ || 10-097-21
ఓషధయః సం వదన్తే సోమేన సహ రాజ్ఞా |
యస్మై కృణోతి బ్రాహ్మణస్ తం రాజన్ పారయామసి || 10-097-22
త్వమ్ ఉత్తమాస్య్ ఓషధే తవ వృక్షా ఉపస్తయః |
ఉపస్తిర్ అస్తు సో ऽస్మాకం యో అస్మాఅభిదాసతి || 10-097-23
