ఋగ్వేదము - మండలము 10 - సూక్తము 92

వికీసోర్స్ నుండి
Jump to navigation Jump to search
ఋగ్వేదము (ఋగ్వేదము - మండలము 10 - సూక్తము 92)
దేవత : , చంధస్సు :


ఋగ్వేదము
మండలములు
మండలము 1
మండలము 2
మండలము 3
మండలము 4
మండలము 5
మండలము 6
మండలము 7
మండలము 8
మండలము 9
మండలము 10

  యజ్ఞస్య వో రథ్యం విశ్పతిం విశాం హోతారమ్ అక్తోర్ అతిథిం విభావసుమ్ |
  శోచఞ్ ఛుష్కాసు హరిణీషు జర్భురద్ వృషా కేతుర్ యజతో ద్యామ్ అశాయత || 10-092-01
  ఇమమ్ అఞ్జస్పామ్ ఉభయే అకృణ్వత ధర్మాణమ్ అగ్నిం విదథస్య సాధనమ్ |
  అక్తుం న యహ్వమ్ ఉషసః పురోహితం తనూనపాతమ్ అరుషస్య నింసతే || 10-092-02
  బళ్ అస్య నీథా వి పణేశ్ చ మన్మహే వయా అస్య ప్రహుతా ఆసుర్ అత్తవే |
  యదా ఘోరాసో అమృతత్వమ్ ఆశతాద్ ఇజ్ జనస్య దైవ్యస్య చర్కిరన్ || 10-092-03
  ఋతస్య హి ప్రసితిర్ ద్యౌర్ ఉరు వ్యచో నమో మహ్య్ అరమతిః పనీయసీ |
  ఇన్ద్రో మిత్రో వరుణః సం చికిత్రిరే ऽథో భగః సవితా పూతదక్షసః || 10-092-04
  ప్ర రుద్రేణ యయినా యన్తి సిన్ధవస్ తిరో మహీమ్ అరమతిం దధన్విరే |
  యేభిః పరిజ్మా పరియన్న్ ఉరు జ్రయో వి రోరువజ్ జఠరే విశ్వమ్ ఉక్షతే || 10-092-05
  క్రాణా రుద్రా మరుతో విశ్వకృష్టయో దివః శ్యేనాసో అసురస్య నీళయః |
  తేభిశ్ చష్టే వరుణో మిత్రో అర్యమేన్ద్రో దేవేభిర్ అర్వశేభిర్ అర్వశః || 10-092-06
  ఇన్ద్రే భుజం శశమానాస ఆశత సూరో దృశీకే వృషణశ్ చ పౌంస్యే |
  ప్ర యే న్వ్ అస్యార్హణా తతక్షిరే యుజం వజ్రం నృషదనేషు కారవః || 10-092-07
  సూరశ్ చిద్ ఆ హరితో అస్య రీరమద్ ఇన్ద్రాద్ ఆ కశ్ చిద్ భయతే తవీయసః |
  భీమస్య వృష్ణో జఠరాద్ అభిశ్వసో దివే-దివే సహురి స్తన్న్ అబాధితః || 10-092-08
  స్తోమం వో అద్య రుద్రాయ శిక్వసే క్షయద్వీరాయ నమసా దిదిష్టన |
  యేభిః శివః స్వవాఏవయావభిర్ దివః సిషక్తి స్వయశా నికామభిః || 10-092-09
  తే హి ప్రజాయా అభరన్త వి శ్రవో బృహస్పతిర్ వృషభః సోమజామయః |
  యజ్ఞైర్ అథర్వా ప్రథమో వి ధారయద్ దేవా దక్షైర్ భృగవః సం చికిత్రిరే || 10-092-10
  తే హి ద్యావాపృథివీ భూరిరేతసా నరాశంసశ్ చతురఙ్గో యమో ऽదితిః |
  దేవస్ త్వష్టా ద్రవిణోదా ఋభుక్షణః ప్ర రోదసీ మరుతో విష్ణుర్ అర్హిరే || 10-092-11
  ఉత స్య న ఉశిజామ్ ఉర్వియా కవిర్ అహిః శృణోతు బుధ్న్యో హవీమని |
  సూర్యామాసా విచరన్తా దివిక్షితా ధియా శమీనహుషీ అస్య బోధతమ్ || 10-092-12
  ప్ర నః పూషా చరథం విశ్వదేవ్యో ऽపాం నపాద్ అవతు వాయుర్ ఇష్టయే |
  ఆత్మానం వస్యో అభి వాతమ్ అర్చత తద్ అశ్వినా సుహవా యామని శ్రుతమ్ || 10-092-13
  విశామ్ ఆసామ్ అభయానామ్ అధిక్షితం గీర్భిర్ ఉ స్వయశసం గృణీమసి |
  గ్నాభిర్ విశ్వాభిర్ అదితిమ్ అనర్వణమ్ అక్తోర్ యువానం నృమణా అధా పతిమ్ || 10-092-14
  రేభద్ అత్ర జనుషా పూర్వో అఙ్గిరా గ్రావాణ ఊర్ధ్వా అభి చక్షుర్ అధ్వరమ్ |
  యేభిర్ విహాయా అభవద్ విచక్షణః పాథః సుమేకం స్వధితిర్ వనన్వతి || 10-092-15