ఇన్ద్రం స్తవా నృతమం యస్య మహ్నా విబబాధే రోచనా వి జ్మో అన్తాన్ |
ఆ యః పప్రౌ చర్షణీధృద్ వరోభిః ప్ర సిన్ధుభ్యో రిరిచానో మహిత్వా || 10-089-01
స సూర్యః పర్య్ ఉరూ వరాంస్య్ ఏన్ద్రో వవృత్యాద్ రథ్యేవ చక్రా |
అతిష్ఠన్తమ్ అపస్యం న సర్గం కృష్ణా తమాంసి త్విష్యా జఘాన || 10-089-02
సమానమ్ అస్మా అనపావృద్ అర్చ క్ష్మయా దివో అసమమ్ బ్రహ్మ నవ్యమ్ |
వి యః పృష్ఠేవ జనిమాన్య్ అర్య ఇన్ద్రశ్ చికాయ న సఖాయమ్ ఈషే || 10-089-03
ఇన్ద్రాయ గిరో అనిశితసర్గా అపః ప్రేరయం సగరస్య బుధ్నాత్ |
యో అక్షేణేవ చక్రియా శచీభిర్ విష్వక్ తస్తమ్భ పృథివీమ్ ఉత ద్యామ్ || 10-089-04
ఆపాన్తమన్యుస్ తృపలప్రభర్మా ధునిః శిమీవాఞ్ ఛరుమాఋజీషీ |
సోమో విశ్వాన్య్ అతసా వనాని నార్వాగ్ ఇన్ద్రమ్ ప్రతిమానాని దేభుః || 10-089-05
న యస్య ద్యావాపృథివీ న ధన్వ నాన్తరిక్షం నాద్రయః సోమో అక్షాః |
యద్ అస్య మన్యుర్ అధినీయమానః శృణాతి వీళు రుజతి స్థిరాణి || 10-089-06
జఘాన వృత్రం స్వధితిర్ వనేవ రురోజ పురో అరదన్ న సిన్ధూన్ |
బిభేద గిరిం నవమ్ ఇన్ న కుమ్భమ్ ఆ గా ఇన్ద్రో అకృణుత స్వయుగ్భిః || 10-089-07
త్వం హ త్యద్ ఋణయా ఇన్ద్ర ధీరో ऽసిర్ న పర్వ వృజినా శృణాసి |
ప్ర యే మిత్రస్య వరుణస్య ధామ యుజం న జనా మినన్తి మిత్రమ్ || 10-089-08
ప్ర యే మిత్రమ్ ప్రార్యమణం దురేవాః ప్ర సంగిరః ప్ర వరుణమ్ మినన్తి |
న్య్ అమిత్రేషు వధమ్ ఇన్ద్ర తుమ్రం వృషన్ వృషాణమ్ అరుషం శిశీహి || 10-089-09
ఇన్ద్రో దివ ఇన్ద్ర ఈశే పృథివ్యా ఇన్ద్రో అపామ్ ఇన్ద్ర ఇత్ పర్వతానామ్ |
ఇన్ద్రో వృధామ్ ఇన్ద్ర ఇన్ మేధిరాణామ్ ఇన్ద్రః క్షేమే యోగే హవ్య ఇన్ద్రః || 10-089-10
ప్రాక్తుభ్య ఇన్ద్రః ప్ర వృధో అహభ్యః ప్రాన్తరిక్షాత్ ప్ర సముద్రస్య ధాసేః |
ప్ర వాతస్య ప్రథసః ప్ర జ్మో అన్తాత్ ప్ర సిన్ధుభ్యో రిరిచే ప్ర క్షితిభ్యః || 10-089-11
ప్ర శోశుచత్యా ఉషసో న కేతుర్ అసిన్వా తే వర్తతామ్ ఇన్ద్ర హేతిః |
అశ్మేవ విధ్య దివ ఆ సృజానస్ తపిష్ఠేన హేషసా ద్రోఘమిత్రాన్ || 10-089-12
అన్వ్ అహ మాసా అన్వ్ ఇద్ వనాన్య్ అన్వ్ ఓషధీర్ అను పర్వతాసః |
అన్వ్ ఇన్ద్రం రోదసీ వావశానే అన్వ్ ఆపో అజిహత జాయమానమ్ || 10-089-13
కర్హి స్విత్ సా త ఇన్ద్ర చేత్యాసద్ అఘస్య యద్ భినదో రక్ష ఏషత్ |
మిత్రక్రువో యచ్ ఛసనే న గావః పృథివ్యా ఆపృగ్ అముయా శయన్తే || 10-089-14
శత్రూయన్తో అభి యే నస్ తతస్రే మహి వ్రాధన్త ఓగణాస ఇన్ద్ర |
అన్ధేనామిత్రాస్ తమసా సచన్తాం సుజ్యోతిషో అక్తవస్ తాఅభి ష్యుః || 10-089-15
పురూణి హి త్వా సవనా జనానామ్ బ్రహ్మాణి మన్దన్ గృణతామ్ ఋషీణామ్ |
ఇమామ్ ఆఘోషన్న్ అవసా సహూతిం తిరో విశ్వాఅర్చతో యాహ్య్ అర్వాఙ్ || 10-089-16
ఏవా తే వయమ్ ఇన్ద్ర భుఞ్జతీనాం విద్యామ సుమతీనాం నవానామ్ |
విద్యామ వస్తోర్ అవసా గృణన్తో విశ్వామిత్రా ఉత త ఇన్ద్ర నూనమ్ || 10-089-17
శునం హువేమ మఘవానమ్ ఇన్ద్రమ్ అస్మిన్ భరే నృతమం వాజసాతౌ |
శృణ్వన్తమ్ ఉగ్రమ్ ఊతయే సమత్సు ఘ్నన్తం వృత్రాణి సంజితం ధనానామ్ || 10-089-18
