త్వయా మన్యో సరథమ్ ఆరుజన్తో హర్షమాణాసో ధృషితా మరుత్వః |
తిగ్మేషవ ఆయుధా సంశిశానా అభి ప్ర యన్తు నరో అగ్నిరూపాః || 10-084-01
అగ్నిర్ ఇవ మన్యో త్విషితః సహస్వ సేనానీర్ నః సహురే హూత ఏధి |
హత్వాయ శత్రూన్ వి భజస్వ వేద ఓజో మిమానో వి మృధో నుదస్వ || 10-084-02
సహస్వ మన్యో అభిమాతిమ్ అస్మే రుజన్ మృణన్ ప్రమృణన్ ప్రేహి శత్రూన్ |
ఉగ్రం తే పాజో నన్వ్ ఆ రురుధ్రే వశీ వశం నయస ఏకజ త్వమ్ || 10-084-03
ఏకో బహూనామ్ అసి మన్యవ్ ఈళితో విశం-విశం యుధయే సం శిశాధి |
అకృత్తరుక్ త్వయా యుజా వయం ద్యుమన్తం ఘోషం విజయాయ కృణ్మహే || 10-084-04
విజేషకృద్ ఇన్ద్ర ఇవానవబ్రవో ऽస్మాకమ్ మన్యో అధిపా భవేహ |
ప్రియం తే నామ సహురే గృణీమసి విద్మా తమ్ ఉత్సం యత ఆబభూథ || 10-084-05
ఆభూత్యా సహజా వజ్ర సాయక సహో బిభర్ష్య్ అభిభూత ఉత్తరమ్ |
క్రత్వా నో మన్యో సహ మేద్య్ ఏధి మహాధనస్య పురుహూత సంసృజి || 10-084-06
సంసృష్టం ధనమ్ ఉభయం సమాకృతమ్ అస్మభ్యం దత్తాం వరుణశ్ చ మన్యుః |
భియం దధానా హృదయేషు శత్రవః పరాజితాసో అప ని లయన్తామ్ || 10-084-07
