ఆ వ ఋఞ్జస ఊర్జాం వ్యుష్టిష్వ్ ఇన్ద్రమ్ మరుతో రోదసీ అనక్తన |
ఉభే యథా నో అహనీ సచాభువా సదః-సదో వరివస్యాత ఉద్భిదా || 10-076-01
తద్ ఉ శ్రేష్ఠం సవనం సునోతనాత్యో న హస్తయతో అద్రిః సోతరి |
విదద్ ధ్య్ అర్యో అభిభూతి పౌంస్యమ్ మహో రాయే చిత్ తరుతే యద్ అర్వతః || 10-076-02
తద్ ఇద్ ధ్య్ అస్య సవనం వివేర్ అపో యథా పురా మనవే గాతుమ్ అశ్రేత్ |
గోర్ణసి త్వాష్ట్రే అశ్వనిర్ణిజి ప్రేమ్ అధ్వరేష్వ్ అధ్వరాఅశిశ్రయుః || 10-076-03
అప హత రక్షసో భఙ్గురావత స్కభాయత నిరృతిం సేధతామతిమ్ |
ఆ నో రయిం సర్వవీరం సునోతన దేవావ్యమ్ భరత శ్లోకమ్ అద్రయః || 10-076-04
దివశ్ చిద్ ఆ వో ऽమవత్తరేభ్యో విభ్వనా చిద్ ఆశ్వపస్తరేభ్యః |
వాయోశ్ చిద్ ఆ సోమరభస్తరేభ్యో ऽగ్నేశ్ చిద్ అర్చ పితుకృత్తరేభ్యః || 10-076-05
భురన్తు నో యశసః సోత్వ్ అన్ధసో గ్రావాణో వాచా దివితా దివిత్మతా |
నరో యత్ర దుహతే కామ్యమ్ మధ్వ్ ఆఘోషయన్తో అభితో మిథస్తురః || 10-076-06
సున్వన్తి సోమం రథిరాసో అద్రయో నిర్ అస్య రసం గవిషో దుహన్తి తే |
దుహన్త్య్ ఊధర్ ఉపసేచనాయ కం నరో హవ్యా న మర్జయన్త ఆసభిః || 10-076-07
ఏతే నరః స్వపసో అభూతన య ఇన్ద్రాయ సునుథ సోమమ్ అద్రయః |
వామం-వామం వో దివ్యాయ ధామ్నే వసు-వసు వః పార్థివాయ సున్వతే || 10-076-08
