ఇమామ్ మే అగ్నే సమిధం జుషస్వేళస్ పదే ప్రతి హర్యా ఘృతాచీమ్ |
వర్ష్మన్ పృథివ్యాః సుదినత్వే అహ్నామ్ ఊర్ధ్వో భవ సుక్రతో దేవయజ్యా || 10-070-01
ఆ దేవానామ్ అగ్రయావేహ యాతు నరాశంసో విశ్వరూపేభిర్ అశ్వైః |
ఋతస్య పథా నమసా మియేధో దేవేభ్యో దేవతమః సుషూదత్ || 10-070-02
శశ్వత్తమమ్ ఈళతే దూత్యాయ హవిష్మన్తో మనుష్యాసో అగ్నిమ్ |
వహిష్ఠైర్ అశ్వైః సువృతా రథేనా దేవాన్ వక్షి ని షదేహ హోతా || 10-070-03
వి ప్రథతాం దేవజుష్టం తిరశ్చా దీర్ఘం ద్రాఘ్మా సురభి భూత్వ్ అస్మే |
అహేళతా మనసా దేవ బర్హిర్ ఇన్ద్రజ్యేష్ఠాఉశతో యక్షి దేవాన్ || 10-070-04
దివో వా సాను స్పృశతా వరీయః పృథివ్యా వా మాత్రయా వి శ్రయధ్వమ్ |
ఉశతీర్ ద్వారో మహినా మహద్భిర్ దేవం రథం రథయుర్ ధారయధ్వమ్ || 10-070-05
దేవీ దివో దుహితరా సుశిల్పే ఉషాసానక్తా సదతాం ని యోనౌ |
ఆ వాం దేవాస ఉశతీ ఉశన్త ఉరౌ సీదన్తు సుభగే ఉపస్థే || 10-070-06
ఊర్ధ్వో గ్రావా బృహద్ అగ్నిః సమిద్ధః ప్రియా ధామాన్య్ అదితేర్ ఉపస్థే |
పురోహితావ్ ఋత్విజా యజ్ఞే అస్మిన్ విదుష్టరా ద్రవిణమ్ ఆ యజేథామ్ || 10-070-07
తిస్రో దేవీర్ బర్హిర్ ఇదం వరీయ ఆ సీదత చకృమా వః స్యోనమ్ |
మనుష్వద్ యజ్ఞం సుధితా హవీంషీళా దేవీ ఘృతపదీ జుషన్త || 10-070-08
దేవ త్వష్టర్ యద్ ధ చారుత్వమ్ ఆనడ్ యద్ అఙ్గిరసామ్ అభవః సచాభూః |
స దేవానామ్ పాథ ఉప ప్ర విద్వాఉశన్ యక్షి ద్రవిణోదః సురత్నః || 10-070-09
వనస్పతే రశనయా నియూయా దేవానామ్ పాథ ఉప వక్షి విద్వాన్ |
స్వదాతి దేవః కృణవద్ ధవీంష్య్ అవతాం ద్యావాపృథివీ హవమ్ మే || 10-070-10
ఆగ్నే వహ వరుణమ్ ఇష్టయే న ఇన్ద్రం దివో మరుతో అన్తరిక్షాత్ |
సీదన్తు బర్హిర్ విశ్వ ఆ యజత్రాః స్వాహా దేవా అమృతా మాదయన్తామ్ || 10-070-11