జగృభ్మా తే దక్షిణమ్ ఇన్ద్ర హస్తం వసూయవో వసుపతే వసూనామ్ |
విద్మా హి త్వా గోపతిం శూర గోనామ్ అస్మభ్యం చిత్రం వృషణం రయిం దాః || 10-047-01
స్వాయుధం స్వవసం సునీథం చతుఃసముద్రం ధరుణం రయీణామ్ |
చర్కృత్యం శంస్యమ్ భూరివారమ్ అస్మభ్యం చిత్రం వృషణం రయిం దాః || 10-047-02
సుబ్రహ్మాణం దేవవన్తమ్ బృహన్తమ్ ఉరుం గభీరమ్ పృథుబుధ్నమ్ ఇన్ద్ర |
శ్రుతఋషిమ్ ఉగ్రమ్ అభిమాతిషాహమ్ అస్మభ్యం చిత్రం వృషణం రయిం దాః || 10-047-03
సనద్వాజం విప్రవీరం తరుత్రం ధనస్పృతం శూశువాంసం సుదక్షమ్ |
దస్యుహనమ్ పూర్భిదమ్ ఇన్ద్ర సత్యమ్ అస్మభ్యం చిత్రం వృషణం రయిం దాః || 10-047-04
అశ్వావన్తం రథినం వీరవన్తం సహస్రిణం శతినం వాజమ్ ఇన్ద్ర |
భద్రవ్రాతం విప్రవీరం స్వర్షామ్ అస్మభ్యం చిత్రం వృషణం రయిం దాః || 10-047-05
ప్ర సప్తగుమ్ ఋతధీతిం సుమేధామ్ బృహస్పతిమ్ మతిర్ అచ్ఛా జిగాతి |
య ఆఙ్గిరసో నమసోపసద్యో ऽస్మభ్యం చిత్రం వృషణం రయిం దాః || 10-047-06
వనీవానో మమ దూతాస ఇన్ద్రం స్తోమాశ్ చరన్తి సుమతీర్ ఇయానాః |
హృదిస్పృశో మనసా వచ్యమానా అస్మభ్యం చిత్రం వృషణం రయిం దాః || 10-047-07
యత్ త్వా యామి దద్ధి తన్ న ఇన్ద్ర బృహన్తం క్షయమ్ అసమం జనానామ్ |
అభి తద్ ద్యావాపృథివీ గృణీతామ్ అస్మభ్యం చిత్రం వృషణం రయిం దాః || 10-047-08
