ఆ యాత్వ్ ఇన్ద్రః స్వపతిర్ మదాయ యో ధర్మణా తూతుజానస్ తువిష్మాన్ |
ప్రత్వక్షాణో అతి విశ్వా సహాంస్య్ అపారేణ మహతా వృష్ణ్యేన || 10-044-01
సుష్ఠామా రథః సుయమా హరీ తే మిమ్యక్ష వజ్రో నృపతే గభస్తౌ |
శీభం రాజన్ సుపథా యాహ్య్ అర్వాఙ్ వర్ధామ తే పపుషో వృష్ణ్యాని || 10-044-02
ఏన్ద్రవాహో నృపతిం వజ్రబాహుమ్ ఉగ్రమ్ ఉగ్రాసస్ తవిషాస ఏనమ్ |
ప్రత్వక్షసం వృషభం సత్యశుష్మమ్ ఏమ్ అస్మత్రా సధమాదో వహన్తు || 10-044-03
ఏవా పతిం ద్రోణసాచం సచేతసమ్ ఊర్జ స్కమ్భం ధరుణ ఆ వృషాయసే |
ఓజః కృష్వ సం గృభాయ త్వే అప్య్ అసో యథా కేనిపానామ్ ఇనో వృధే || 10-044-04
గమన్న్ అస్మే వసూన్య్ ఆ హి శంసిషం స్వాశిషమ్ భరమ్ ఆ యాహి సోమినః |
త్వమ్ ఈశిషే సాస్మిన్న్ ఆ సత్సి బర్హిష్య్ అనాధృష్యా తవ పాత్రాణి ధర్మణా || 10-044-05
పృథక్ ప్రాయన్ ప్రథమా దేవహూతయో ऽకృణ్వత శ్రవస్యాని దుష్టరా |
న యే శేకుర్ యజ్ఞియాం నావమ్ ఆరుహమ్ ఈర్మైవ తే న్య్ అవిశన్త కేపయః || 10-044-06
ఏవైవాపాగ్ అపరే సన్తు దూఢ్యో ऽశ్వా యేషాం దుర్యుజ ఆయుయుజ్రే |
ఇత్థా యే ప్రాగ్ ఉపరే సన్తి దావనే పురూణి యత్ర వయునాని భోజనా || 10-044-07
గిరీఅజ్రాన్ రేజమానాఅధారయద్ ద్యౌః క్రన్దద్ అన్తరిక్షాణి కోపయత్ |
సమీచీనే ధిషణే వి ష్కభాయతి వృష్ణః పీత్వా మద ఉక్థాని శంసతి || 10-044-08
ఇమమ్ బిభర్మి సుకృతం తే అఙ్కుశం యేనారుజాసి మఘవఞ్ ఛఫారుజః |
అస్మిన్ సు తే సవనే అస్త్వ్ ఓక్యం సుత ఇష్టౌ మఘవన్ బోధ్య్ ఆభగః || 10-044-09
గోభిష్ టరేమామతిం దురేవాం యవేన క్షుధమ్ పురుహూత విశ్వామ్ |
వయం రాజభిః ప్రథమా ధనాన్య్ అస్మాకేన వృజనేనా జయేమ || 10-044-10
బృహస్పతిర్ నః పరి పాతు పశ్చాద్ ఉతోత్తరస్మాద్ అధరాద్ అఘాయోః |
ఇన్ద్రః పురస్తాద్ ఉత మధ్యతో నః సఖా సఖిభ్యో వరివః కృణోతు || 10-044-11
