ఉషాసానక్తా బృహతీ సుపేశసా ద్యావాక్షామా వరుణో మిత్రో అర్యమా |
ఇన్ద్రం హువే మరుతః పర్వతాఅప ఆదిత్యాన్ ద్యావాపృథివీ అపః స్వః || 10-036-01
ద్యౌశ్ చ నః పృథివీ చ ప్రచేతస ఋతావరీ రక్షతామ్ అంహసో రిషః |
మా దుర్విదత్రా నిరృతిర్ న ఈశత తద్ దేవానామ్ అవో అద్యా వృణీమహే || 10-036-02
విశ్వస్మాన్ నో అదితిః పాత్వ్ అంహసో మాతా మిత్రస్య వరుణస్య రేవతః |
స్వర్వజ్ జ్యోతిర్ అవృకం నశీమహి తద్ దేవానామ్ అవో అద్యా వృణీమహే || 10-036-03
గ్రావా వదన్న్ అప రక్షాంసి సేధతు దుష్వప్న్యం నిరృతిం విశ్వమ్ అత్రిణమ్ |
ఆదిత్యం శర్మ మరుతామ్ అశీమహి తద్ దేవానామ్ అవో అద్యా వృణీమహే || 10-036-04
ఏన్ద్రో బర్హిః సీదతు పిన్వతామ్ ఇళా బృహస్పతిః సామభిర్ ఋక్వో అర్చతు |
సుప్రకేతం జీవసే మన్మ ధీమహి తద్ దేవానామ్ అవో అద్యా వృణీమహే || 10-036-05
దివిస్పృశం యజ్ఞమ్ అస్మాకమ్ అశ్వినా జీరాధ్వరం కృణుతం సుమ్నమ్ ఇష్టయే |
ప్రాచీనరశ్మిమ్ ఆహుతం ఘృతేన తద్ దేవానామ్ అవో అద్యా వృణీమహే || 10-036-06
ఉప హ్వయే సుహవమ్ మారుతం గణమ్ పావకమ్ ఋష్వం సఖ్యాయ శమ్భువమ్ |
రాయస్ పోషం సౌశ్రవసాయ ధీమహి తద్ దేవానామ్ అవో అద్యా వృణీమహే || 10-036-07
అపామ్ పేరుం జీవధన్యమ్ భరామహే దేవావ్యం సుహవమ్ అధ్వరశ్రియమ్ |
సురశ్మిం సోమమ్ ఇన్ద్రియం యమీమహి తద్ దేవానామ్ అవో అద్యా వృణీమహే || 10-036-08
సనేమ తత్ సుసనితా సనిత్వభిర్ వయం జీవా జీవపుత్రా అనాగసః |
బ్రహ్మద్విషో విష్వగ్ ఏనో భరేరత తద్ దేవానామ్ అవో అద్యా వృణీమహే || 10-036-09
యే స్థా మనోర్ యజ్ఞియాస్ తే శృణోతన యద్ వో దేవా ఈమహే తద్ దదాతన |
జైత్రం క్రతుం రయిమద్ వీరవద్ యశస్ తద్ దేవానామ్ అవో అద్యా వృణీమహే || 10-036-10
మహద్ అద్య మహతామ్ ఆ వృణీమహే ऽవో దేవానామ్ బృహతామ్ అనర్వణామ్ |
యథా వసు వీరజాతం నశామహై తద్ దేవానామ్ అవో అద్యా వృణీమహే || 10-036-11
మహో అగ్నేః సమిధానస్య శర్మణ్య్ అనాగా మిత్రే వరుణే స్వస్తయే |
శ్రేష్ఠే స్యామ సవితుః సవీమని తద్ దేవానామ్ అవో అద్యా వృణీమహే || 10-036-12
యే సవితుః సత్యసవస్య విశ్వే మిత్రస్య వ్రతే వరుణస్య దేవాః |
తే సౌభగం వీరవద్ గోమద్ అప్నో దధాతన ద్రవిణం చిత్రమ్ అస్మే || 10-036-13
సవితా పశ్చాతాత్ సవితా పురస్తాత్ సవితోత్తరాత్తాత్ సవితాధరాత్తాత్ |
సవితా నః సువతు సర్వతాతిం సవితా నో రాసతాం దీర్ఘమ్ ఆయుః || 10-036-14
