ఆగ్నిం న స్వవృక్తిభిర్ హోతారం త్వా వృణీమహే |
యజ్ఞాయ స్తీర్ణబర్హిషే వి వో మదే శీరమ్ పావకశోచిషం వివక్షసే || 10-021-01
త్వామ్ ఉ తే స్వాభువః శుమ్భన్త్య్ అశ్వరాధసః |
వేతి త్వామ్ ఉపసేచనీ వి వో మద ఋజీతిర్ అగ్న ఆహుతిర్ వివక్షసే || 10-021-02
త్వే ధర్మాణ ఆసతే జుహూభిః సిఞ్చతీర్ ఇవ |
కృష్ణా రూపాణ్య్ అర్జునా వి వో మదే విశ్వా అధి శ్రియో ధిషే వివక్షసే || 10-021-03
యమ్ అగ్నే మన్యసే రయిం సహసావన్న్ అమర్త్య |
తమ్ ఆ నో వాజసాతయే వి వో మదే యజ్ఞేషు చిత్రమ్ ఆ భరా వివక్షసే || 10-021-04
అగ్నిర్ జాతో అథర్వణా విదద్ విశ్వాని కావ్యా |
భువద్ దూతో వివస్వతో వి వో మదే ప్రియో యమస్య కామ్యో వివక్షసే || 10-021-05
త్వాం యజ్ఞేష్వ్ ఈళతే ऽగ్నే ప్రయత్య్ అధ్వరే |
త్వం వసూని కామ్యా వి వో మదే విశ్వా దధాసి దాశుషే వివక్షసే || 10-021-06
త్వాం యజ్ఞేష్వ్ ఋత్విజం చారుమ్ అగ్నే ని షేదిరే |
ఘృతప్రతీకమ్ మనుషో వి వో మదే శుక్రం చేతిష్ఠమ్ అక్షభిర్ వివక్షసే || 10-021-07
అగ్నే శుక్రేణ శోచిషోరు ప్రథయసే బృహత్ |
అభిక్రన్దన్ వృషాయసే వి వో మదే గర్భం దధాసి జామిషు వివక్షసే || 10-021-08
