ని వర్తధ్వమ్ మాను గాతాస్మాన్ సిషక్త రేవతీః |
అగ్నీషోమా పునర్వసూ అస్మే ధారయతం రయిమ్ || 10-019-01
పునర్ ఏనా ని వర్తయ పునర్ ఏనా న్య్ ఆ కురు |
ఇన్ద్ర ఏణా ని యచ్ఛత్వ్ అగ్నిర్ ఏనా ఉపాజతు || 10-019-02
పునర్ ఏతా ని వర్తన్తామ్ అస్మిన్ పుష్యన్తు గోపతౌ |
ఇహైవాగ్నే ని ధారయేహ తిష్ఠతు యా రయిః || 10-019-03
యన్ నియానం న్యయనం సంజ్ఞానం యత్ పరాయణమ్ |
ఆవర్తనం నివర్తనం యో గోపా అపి తం హువే || 10-019-04
య ఉదానడ్ వ్యయనం య ఉదానట్ పరాయణమ్ |
ఆవర్తనం నివర్తనమ్ అపి గోపా ని వర్తతామ్ || 10-019-05
ఆ నివర్త ని వర్తయ పునర్ న ఇన్ద్ర గా దేహి |
జీవాభిర్ భునజామహై || 10-019-06
పరి వో విశ్వతో దధ ఊర్జా ఘృతేన పయసా |
యే దేవాః కే చ యజ్ఞియాస్ తే రయ్యా సం సృజన్తు నః || 10-019-07
ఆ నివర్తన వర్తయ ని నివర్తన వర్తయ |
భూమ్యాశ్ చతస్రః ప్రదిశస్ తాభ్య ఏనా ని వర్తయ || 10-019-08
