మైనమ్ అగ్నే వి దహో మాభి శోచో మాస్య త్వచం చిక్షిపో మా శరీరమ్ |
యదా శృతం కృణవో జాతవేదో ऽథేమ్ ఏనమ్ ప్ర హిణుతాత్ పితృభ్యః || 10-016-01
శృతం యదా కరసి జాతవేదో ऽథేమ్ ఏనమ్ పరి దత్తాత్ పితృభ్యః |
యదా గచ్ఛాత్య్ అసునీతిమ్ ఏతామ్ అథా దేవానాం వశనీర్ భవాతి || 10-016-02
సూర్యం చక్షుర్ గచ్ఛతు వాతమ్ ఆత్మా ద్యాం చ గచ్ఛ పృథివీం చ ధర్మణా |
అపో వా గచ్ఛ యది తత్ర తే హితమ్ ఓషధీషు ప్రతి తిష్ఠా శరీరైః || 10-016-03
అజో భాగస్ తపసా తం తపస్వ తం తే శోచిస్ తపతు తం తే అర్చిః |
యాస్ తే శివాస్ తన్వో జాతవేదస్ తాభిర్ వహైనం సుకృతామ్ ఉలోకమ్ || 10-016-04
అవ సృజ పునర్ అగ్నే పితృభ్యో యస్ త ఆహుతశ్ చరతి స్వధాభిః |
ఆయుర్ వసాన ఉప వేతు శేషః సం గచ్ఛతాం తన్వా జాతవేదః || 10-016-05
యత్ తే కృష్ణః శకున ఆతుతోద పిపీలః సర్ప ఉత వా శ్వాపదః |
అగ్నిష్ టద్ విశ్వాద్ అగదం కృణోతు సోమశ్ చ యో బ్రాహ్మణాఆవివేశ || 10-016-06
అగ్నేర్ వర్మ పరి గోభిర్ వ్యయస్వ సమ్ ప్రోర్ణుష్వ పీవసా మేదసా చ |
నేత్ త్వా ధృష్ణుర్ హరసా జర్హృషాణో దధృగ్ విధక్ష్యన్ పర్యఙ్ఖయాతే || 10-016-07
ఇమమ్ అగ్నే చమసమ్ మా వి జిహ్వరః ప్రియో దేవానామ్ ఉత సోమ్యానామ్ |
ఏష యశ్ చమసో దేవపానస్ తస్మిన్ దేవా అమృతా మాదయన్తే || 10-016-08
క్రవ్యాదమ్ అగ్నిమ్ ప్ర హిణోమి దూరం యమరాజ్ఞో గచ్ఛతు రిప్రవాహః |
ఇహైవాయమ్ ఇతరో జాతవేదా దేవేభ్యో హవ్యం వహతు ప్రజానన్ || 10-016-09
యో అగ్నిః క్రవ్యాత్ ప్రవివేశ వో గృహమ్ ఇమమ్ పశ్యన్న్ ఇతరం జాతవేదసమ్ |
తం హరామి పితృయజ్ఞాయ దేవం స ఘర్మమ్ ఇన్వాత్ పరమే సధస్థే || 10-016-10
యో అగ్నిః క్రవ్యవాహనః పితౄన్ యక్షద్ ఋతావృధః |
ప్రేద్ ఉ హవ్యాని వోచతి దేవేభ్యశ్ చ పితృభ్య ఆ || 10-016-11
ఉశన్తస్ త్వా ని ధీమహ్య్ ఉశన్తః సమ్ ఇధీమహి |
ఉశన్న్ ఉశత ఆ వహ పితౄన్ హవిషే అత్తవే || 10-016-12
యం త్వమ్ అగ్నే సమదహస్ తమ్ ఉ నిర్ వాపయా పునః |
కియామ్బ్వ్ అత్ర రోహతు పాకదూర్వా వ్యల్కశా || 10-016-13
శీతికే శీతికావతి హ్లాదికే హ్లాదికావతి |
మణ్డూక్యా సు సం గమ ఇమం స్వ్ అగ్నిం హర్షయ || 10-016-14
