పరేయివాంసమ్ ప్రవతో మహీర్ అను బహుభ్యః పన్థామ్ అనుపస్పశానమ్ |
వైవస్వతం సంగమనం జనానాం యమం రాజానం హవిషా దువస్య || 10-014-01
యమో నో గాతుమ్ ప్రథమో వివేద నైషా గవ్యూతిర్ అపభర్తవా ఉ |
యత్రా నః పూర్వే పితరః పరేయుర్ ఏనా జజ్ఞానాః పథ్యా అను స్వాః || 10-014-02
మాతలీ కవ్యైర్ యమో అఙ్గిరోభిర్ బృహస్పతిర్ ఋక్వభిర్ వావృధానః |
యాంశ్ చ దేవా వావృధుర్ యే చ దేవాన్ స్వాహాన్యే స్వధయాన్యే మదన్తి || 10-014-03
ఇమం యమ ప్రస్తరమ్ ఆ హి సీదాఙ్గిరోభిః పితృభిః సంవిదానః |
ఆ త్వా మన్త్రాః కవిశస్తా వహన్త్వ్ ఏనా రాజన్ హవిషా మాదయస్వ || 10-014-04
అఙ్గిరోభిర్ ఆ గహి యజ్ఞియేభిర్ యమ వైరూపైర్ ఇహ మాదయస్వ |
వివస్వన్తం హువే యః పితా తే ऽస్మిన్ యజ్ఞే బర్హిష్య్ ఆ నిషద్య || 10-014-05
అఙ్గిరసో నః పితరో నవగ్వా అథర్వాణో భృగవః సోమ్యాసః |
తేషాం వయం సుమతౌ యజ్ఞియానామ్ అపి భద్రే సౌమనసే స్యామ || 10-014-06
ప్రేహి ప్రేహి పథిభిః పూర్వ్యేభిర్ యత్రా నః పూర్వే పితరః పరేయుః |
ఉభా రాజానా స్వధయా మదన్తా యమమ్ పశ్యాసి వరుణం చ దేవమ్ || 10-014-07
సం గచ్ఛస్వ పితృభిః సం యమేనేష్టాపూర్తేన పరమే వ్యోమన్ |
హిత్వాయావద్యమ్ పునర్ అస్తమ్ ఏహి సం గచ్ఛస్వ తన్వా సువర్చాః || 10-014-08
అపేత వీత వి చ సర్పతాతో ऽస్మా ఏతమ్ పితరో లోకమ్ అక్రన్ |
అహోభిర్ అద్భిర్ అక్తుభిర్ వ్యక్తం యమో దదాత్య్ అవసానమ్ అస్మై || 10-014-09
అతి ద్రవ సారమేయౌ శ్వానౌ చతురక్షౌ శబలౌ సాధునా పథా |
అథా పితౄన్ సువిదత్రాఉపేహి యమేన యే సధమాదమ్ మదన్తి || 10-014-10
యౌ తే శ్వానౌ యమ రక్షితారౌ చతురక్షౌ పథిరక్షీ నృచక్షసౌ |
తాభ్యామ్ ఏనమ్ పరి దేహి రాజన్ స్వస్తి చాస్మా అనమీవం చ ధేహి || 10-014-11
ఉరూణసావ్ అసుతృపా ఉదుమ్బలౌ యమస్య దూతౌ చరతో జనాఅను |
తావ్ అస్మభ్యం దృశయే సూర్యాయ పునర్ దాతామ్ అసుమ్ అద్యేహ భద్రమ్ || 10-014-12
యమాయ సోమం సునుత యమాయ జుహుతా హవిః |
యమం హ యజ్ఞో గచ్ఛత్య్ అగ్నిదూతో అరంకృతః || 10-014-13
యమాయ ఘృతవద్ ధవిర్ జుహోత ప్ర చ తిష్ఠత |
స నో దేవేష్వ్ ఆ యమద్ దీర్ఘమ్ ఆయుః ప్ర జీవసే || 10-014-14
యమాయ మధుమత్తమం రాజ్ఞే హవ్యం జుహోతన |
ఇదం నమ ఋషిభ్యః పూర్వజేభ్యః పూర్వేభ్యః పథికృద్భ్యః || 10-014-15
త్రికద్రుకేభిః పతతి షళ్ ఉర్వీర్ ఏకమ్ ఇద్ బృహత్ |
త్రిష్టుబ్ గాయత్రీ ఛన్దాంసి సర్వా తా యమ ఆహితా || 10-014-16