ఉత దేవా అవహితం దేవా ఉన్ నయథా పునః |
ఉతాగశ్ చక్రుషం దేవా దేవా జీవయథా పునః || 10-137-01
ద్వావ్ ఇమౌ వాతౌ వాత ఆ సిన్ధోర్ ఆ పరావతః |
దక్షం తే అన్య ఆ వాతు పరాన్యో వాతు యద్ రపః || 10-137-02
ఆ వాత వాహి భేషజం వి వాత వాహి యద్ రపః |
త్వం హి విశ్వభేషజో దేవానాం దూత ఈయసే || 10-137-03
ఆ త్వాగమం శంతాతిభిర్ అథో అరిష్టతాతిభిః |
దక్షం తే భద్రమ్ ఆభార్షమ్ పరా యక్ష్మం సువామి తే || 10-137-04
త్రాయన్తామ్ ఇహ దేవాస్ త్రాయతామ్ మరుతాం గణః |
త్రాయన్తాం విశ్వా భూతాని యథాయమ్ అరపా అసత్ || 10-137-05
ఆప ఇద్ వా ఉ భేషజీర్ ఆపో అమీవచాతనీః |
ఆపః సర్వస్య భేషజీస్ తాస్ తే కృణ్వన్తు భేషజమ్ || 10-137-06
హస్తాభ్యాం దశశాఖాభ్యాం జిహ్వా వాచః పురోగవీ |
అనామయిత్నుభ్యాం త్వా తాభ్యాం త్వోప స్పృశామసి || 10-137-07
