ప్రో ష్వ్ అస్మై పురోరథమ్ ఇన్ద్రాయ శూషమ్ అర్చత |
అభీకే చిద్ ఉలోకకృత్ సంగే సమత్సు వృత్రహాస్మాకమ్ బోధి చోదితా నభన్తామ్ అన్యకేషాం జ్యాకా అధి ధన్వసు || 10-133-01
త్వం సిన్ధూఅవాసృజో ऽధరాచో అహన్న్ అహిమ్ |
అశత్రుర్ ఇన్ద్ర జజ్ఞిషే విశ్వమ్ పుష్యసి వార్యం తం త్వా పరి ష్వజామహే నభన్తామ్ అన్యకేషాం జ్యాకా అధి ధన్వసు || 10-133-02
వి షు విశ్వా అరాతయో ऽర్యో నశన్త నో ధియః |
అస్తాసి శత్రవే వధం యో న ఇన్ద్ర జిఘాంసతి యా తే రాతిర్ దదిర్ వసు నభన్తామ్ అన్యకేషాం జ్యాకా అధి ధన్వసు || 10-133-03
యో న ఇన్ద్రాభితో జనో వృకాయుర్ ఆదిదేశతి |
అధస్పదం తమ్ ఈం కృధి విబాధో అసి సాసహిర్ నభన్తామ్ అన్యకేషాం జ్యాకా అధి ధన్వసు || 10-133-04
యో న ఇన్ద్రాభిదాసతి సనాభిర్ యశ్ చ నిష్ట్యః |
అవ తస్య బలం తిర మహీవ ద్యౌర్ అధ త్మనా నభన్తామ్ అన్యకేషాం జ్యాకా అధి ధన్వసు || 10-133-05
వయమ్ ఇన్ద్ర త్వాయవః సఖిత్వమ్ ఆ రభామహే |
ఋతస్య నః పథా నయాతి విశ్వాని దురితా నభన్తామ్ అన్యకేషాం జ్యాకా అధి ధన్వసు || 10-133-06
అస్మభ్యం సు త్వమ్ ఇన్ద్ర తాం శిక్ష యా దోహతే ప్రతి వరం జరిత్రే |
అచ్ఛిద్రోధ్నీ పీపయద్ యథా నః సహస్రధారా పయసా మహీ గౌః || 10-133-07
