అప ప్రాచ ఇన్ద్ర విశ్వాఅమిత్రాన్ అపాపాచో అభిభూతే నుదస్వ |
అపోదీచో అప శూరాధరాచ ఉరౌ యథా తవ శర్మన్ మదేమ || 10-131-01
కువిద్ అఙ్గ యవమన్తో యవం చిద్ యథా దాన్త్య్ అనుపూర్వం వియూయ |
ఇహేహైషాం కృణుహి భోజనాని యే బర్హిషో నమోవృక్తిం న జగ్ముః || 10-131-02
నహి స్థూర్య్ ఋతుథా యాతమ్ అస్తి నోత శ్రవో వివిదే సంగమేషు |
గవ్యన్త ఇన్ద్రం సఖ్యాయ విప్రా అశ్వాయన్తో వృషణం వాజయన్తః || 10-131-03
యువం సురామమ్ అశ్వినా నముచావ్ ఆసురే సచా |
విపిపానా శుభస్ పతీ ఇన్ద్రం కర్మస్వ్ ఆవతమ్ || 10-131-04
పుత్రమ్ ఇవ పితరావ్ అశ్వినోభేన్ద్రావథుః కావ్యైర్ దంసనాభిః |
యత్ సురామం వ్య్ అపిబః శచీభిః సరస్వతీ త్వా మఘవన్న్ అభిష్ణక్ || 10-131-05
ఇన్ద్రః సుత్రామా స్వవాఅవోభిః సుమృళీకో భవతు విశ్వవేదాః |
బాధతాం ద్వేషో అభయం కృణోతు సువీర్యస్య పతయః స్యామ || 10-131-06
తస్య వయం సుమతౌ యజ్ఞియస్యాపి భద్రే సౌమనసే స్యామ |
స సుత్రామా స్వవాఇన్ద్రో అస్మే ఆరాచ్ చిద్ ద్వేషః సనుతర్ యుయోతు || 10-131-07
