తద్ ఇద్ ఆస భువనేషు జ్యేష్ఠం యతో జజ్ఞ ఉగ్రస్ త్వేషనృమ్ణః |
సద్యో జజ్ఞానో ని రిణాతి శత్రూన్ అను యం విశ్వే మదన్త్య్ ఊమాః || 10-120-01
వావృధానః శవసా భూర్యోజాః శత్రుర్ దాసాయ భియసం దధాతి |
అవ్యనచ్ చ వ్యనచ్ చ సస్ని సం తే నవన్త ప్రభృతా మదేషు || 10-120-02
త్వే క్రతుమ్ అపి వృఞ్జన్తి విశ్వే ద్విర్ యద్ ఏతే త్రిర్ భవన్త్య్ ఊమాః |
స్వాదోః స్వాదీయః స్వాదునా సృజా సమ్ అదః సు మధు మధునాభి యోధీః || 10-120-03
ఇతి చిద్ ధి త్వా ధనా జయన్తమ్ మదే-మదే అనుమదన్తి విప్రాః |
ఓజీయో ధృష్ణో స్థిరమ్ ఆ తనుష్వ మా త్వా దభన్ యాతుధానా దురేవాః || 10-120-04
త్వయా వయం శాశద్మహే రణేషు ప్రపశ్యన్తో యుధేన్యాని భూరి |
చోదయామి త ఆయుధా వచోభిః సం తే శిశామి బ్రహ్మణా వయాంసి || 10-120-05
స్తుషేయ్యమ్ పురువర్పసమ్ ఋభ్వమ్ ఇనతమమ్ ఆప్త్యమ్ ఆప్త్యానామ్ |
ఆ దర్షతే శవసా సప్త దానూన్ ప్ర సాక్షతే ప్రతిమానాని భూరి || 10-120-06
ని తద్ దధిషే ऽవరమ్ పరం చ యస్మిన్న్ ఆవిథావసా దురోణే |
ఆ మాతరా స్థాపయసే జిగత్నూ అత ఇనోషి కర్వరా పురూణి || 10-120-07
ఇమా బ్రహ్మ బృహద్దివో వివక్తీన్ద్రాయ శూషమ్ అగ్రియః స్వర్షాః |
మహో గోత్రస్య క్షయతి స్వరాజో దురశ్ చ విశ్వా అవృణోద్ అప స్వాః || 10-120-08
ఏవా మహాన్ బృహద్దివో అథర్వావోచత్ స్వాం తన్వమ్ ఇన్ద్రమ్ ఏవ |
స్వసారో మాతరిభ్వరీర్ అరిప్రా హిన్వన్తి చ శవసా వర్ధయన్తి చ || 10-120-09
