ఇతి వా ఇతి మే మనో గామ్ అశ్వం సనుయామ్ ఇతి |
కువిత్ సోమస్యాపామ్ ఇతి || 10-119-01
ప్ర వాతా ఇవ దోధత ఉన్ మా పీతా అయంసత |
కువిత్ సోమస్యాపామ్ ఇతి || 10-119-02
ఉన్ మా పీతా అయంసత రథమ్ అశ్వా ఇవాశవః |
కువిత్ సోమస్యాపామ్ ఇతి || 10-119-03
ఉప మా మతిర్ అస్థిత వాశ్రా పుత్రమ్ ఇవ ప్రియమ్ |
కువిత్ సోమస్యాపామ్ ఇతి || 10-119-04
అహం తష్టేవ వన్ధురమ్ పర్య్ అచామి హృదా మతిమ్ |
కువిత్ సోమస్యాపామ్ ఇతి || 10-119-05
నహి మే అక్షిపచ్ చనాచ్ఛాన్త్సుః పఞ్చ కృష్టయః |
కువిత్ సోమస్యాపామ్ ఇతి || 10-119-06
నహి మే రోదసీ ఉభే అన్యమ్ పక్షం చన ప్రతి |
కువిత్ సోమస్యాపామ్ ఇతి || 10-119-07
అభి ద్యామ్ మహినా భువమ్ అభీమామ్ పృథివీమ్ మహీమ్ |
కువిత్ సోమస్యాపామ్ ఇతి || 10-119-08
హన్తాహమ్ పృథివీమ్ ఇమాం ని దధానీహ వేహ వా |
కువిత్ సోమస్యాపామ్ ఇతి || 10-119-09
ఓషమ్ ఇత్ పృథివీమ్ అహం జఙ్ఘనానీహ వేహ వా |
కువిత్ సోమస్యాపామ్ ఇతి || 10-119-10
దివి మే అన్యః పక్షో ऽధో అన్యమ్ అచీకృషమ్ |
కువిత్ సోమస్యాపామ్ ఇతి || 10-119-11
అహమ్ అస్మి మహామహో ऽభినభ్యమ్ ఉదీషితః |
కువిత్ సోమస్యాపామ్ ఇతి || 10-119-12
గృహో యామ్య్ అరంకృతో దేవేభ్యో హవ్యవాహనః |
కువిత్ సోమస్యాపామ్ ఇతి || 10-119-13
