ఇన్ద్ర పిబ ప్రతికామం సుతస్య ప్రాతఃసావస్ తవ హి పూర్వపీతిః |
హర్షస్వ హన్తవే శూర శత్రూన్ ఉక్థేభిష్ టే వీర్యా ప్ర బ్రవామ || 10-112-01
యస్ తే రథో మనసో జవీయాన్ ఏన్ద్ర తేన సోమపేయాయ యాహి |
తూయమ్ ఆ తే హరయః ప్ర ద్రవన్తు యేభిర్ యాసి వృషభిర్ మన్దమానః || 10-112-02
హరిత్వతా వర్చసా సూర్యస్య శ్రేష్ఠై రూపైస్ తన్వం స్పర్శయస్వ |
అస్మాభిర్ ఇన్ద్ర సఖిభిర్ హువానః సధ్రీచీనో మాదయస్వా నిషద్య || 10-112-03
యస్య త్యత్ తే మహిమానమ్ మదేష్వ్ ఇమే మహీ రోదసీ నావివిక్తామ్ |
తద్ ఓక ఆ హరిభిర్ ఇన్ద్ర యుక్తైః ప్రియేభిర్ యాహి ప్రియమ్ అన్నమ్ అచ్ఛ || 10-112-04
యస్య శశ్వత్ పపివాఇన్ద్ర శత్రూన్ అనానుకృత్యా రణ్యా చకర్థ |
స తే పురంధిం తవిషీమ్ ఇయర్తి స తే మదాయ సుత ఇన్ద్ర సోమః || 10-112-05
ఇదం తే పాత్రం సనవిత్తమ్ ఇన్ద్ర పిబా సోమమ్ ఏనా శతక్రతో |
పూర్ణ ఆహావో మదిరస్య మధ్వో యం విశ్వ ఇద్ అభిహర్యన్తి దేవాః || 10-112-06
వి హి త్వామ్ ఇన్ద్ర పురుధా జనాసో హితప్రయసో వృషభ హ్వయన్తే |
అస్మాకం తే మధుమత్తమానీమా భువన్ సవనా తేషు హర్య || 10-112-07
ప్ర త ఇన్ద్ర పూర్వ్యాణి ప్ర నూనం వీర్యా వోచమ్ ప్రథమా కృతాని |
సతీనమన్యుర్ అశ్రథాయో అద్రిం సువేదనామ్ అకృణోర్ బ్రహ్మణే గామ్ || 10-112-08
ని షు సీద గణపతే గణేషు త్వామ్ ఆహుర్ విప్రతమం కవీనామ్ |
న ఋతే త్వత్ క్రియతే కిం చనారే మహామ్ అర్కమ్ మఘవఞ్ చిత్రమ్ అర్చ || 10-112-09
అభిఖ్యా నో మఘవన్ నాధమానాన్ సఖే బోధి వసుపతే సఖీనామ్ |
రణం కృధి రణకృత్ సత్యశుష్మాభక్తే చిద్ ఆ భజా రాయే అస్మాన్ || 10-112-10
