కదా వసో స్తోత్రం హర్యత ఆవ శ్మశా రుధద్ వాః |
దీర్ఘం సుతం వాతాప్యాయ || 10-105-01
హరీ యస్య సుయుజా వివ్రతా వేర్ అర్వన్తాను శేపా |
ఉభా రజీ న కేశినా పతిర్ దన్ || 10-105-02
అప యోర్ ఇన్ద్రః పాపజ ఆ మర్తో న శశ్రమాణో బిభీవాన్ |
శుభే యద్ యుయుజే తవిషీవాన్ || 10-105-03
సచాయోర్ ఇన్ద్రశ్ చర్కృష ఆఉపానసః సపర్యన్ |
నదయోర్ వివ్రతయోః శూర ఇన్ద్రః || 10-105-04
అధి యస్ తస్థౌ కేశవన్తా వ్యచస్వన్తా న పుష్ట్యై |
వనోతి శిప్రాభ్యాం శిప్రిణీవాన్ || 10-105-05
ప్రాస్తౌద్ ఋష్వౌజా ఋష్వేభిస్ తతక్ష శూరః శవసా |
ఋభుర్ న క్రతుభిర్ మాతరిశ్వా || 10-105-06
వజ్రం యశ్ చక్రే సుహనాయ దస్యవే హిరీమశో హిరీమాన్ |
అరుతహనుర్ అద్భుతం న రజః || 10-105-07
అవ నో వృజినా శిశీహ్య్ ఋచా వనేమానృచః |
నాబ్రహ్మా యజ్ఞ ఋధగ్ జోషతి త్వే || 10-105-08
ఊర్ధ్వా యత్ తే త్రేతినీ భూద్ యజ్ఞస్య ధూర్షు సద్మన్ |
సజూర్ నావం స్వయశసం సచాయోః || 10-105-09
శ్రియే తే పృశ్నిర్ ఉపసేచనీ భూచ్ ఛ్రియే దర్విర్ అరేపాః |
యయా స్వే పాత్రే సిఞ్చస ఉత్ || 10-105-10
శతం వా యద్ అసుర్య ప్రతి త్వా సుమిత్ర ఇత్థాస్తౌద్ దుర్మిత్ర ఇత్థాస్తౌత్ |
ఆవో యద్ దస్యుహత్యే కుత్సపుత్రమ్ ప్రావో యద్ దస్యుహత్యే కుత్సవత్సమ్ || 10-105-11