అసావి సోమః పురుహూత తుభ్యం హరిభ్యాం యజ్ఞమ్ ఉప యాహి తూయమ్ |
తుభ్యం గిరో విప్రవీరా ఇయానా దధన్విర ఇన్ద్ర పిబా సుతస్య || 10-104-01
అప్సు ధూతస్య హరివః పిబేహ నృభిః సుతస్య జఠరమ్ పృణస్వ |
మిమిక్షుర్ యమ్ అద్రయ ఇన్ద్ర తుభ్యం తేభిర్ వర్ధస్వ మదమ్ ఉక్థవాహః || 10-104-02
ప్రోగ్రామ్ పీతిం వృష్ణ ఇయర్మి సత్యామ్ ప్రయై సుతస్య హర్యశ్వ తుభ్యమ్ |
ఇన్ద్ర ధేనాభిర్ ఇహ మాదయస్వ ధీభిర్ విశ్వాభిః శచ్యా గృణానః || 10-104-03
ఊతీ శచీవస్ తవ వీర్యేణ వయో దధానా ఉశిజ ఋతజ్ఞాః |
ప్రజావద్ ఇన్ద్ర మనుషో దురోణే తస్థుర్ గృణన్తః సధమాద్యాసః || 10-104-04
ప్రణీతిభిష్ టే హర్యశ్వ సుష్టోః సుషుమ్నస్య పురురుచో జనాసః |
మంహిష్ఠామ్ ఊతిం వితిరే దధానా స్తోతార ఇన్ద్ర తవ సూనృతాభిః || 10-104-05
ఉప బ్రహ్మాణి హరివో హరిభ్యాం సోమస్య యాహి పీతయే సుతస్య |
ఇన్ద్ర త్వా యజ్ఞః క్షమమాణమ్ ఆనడ్ దాశ్వాఅస్య్ అధ్వరస్య ప్రకేతః || 10-104-06
సహస్రవాజమ్ అభిమాతిషాహం సుతేరణమ్ మఘవానం సువృక్తిమ్ |
ఉప భూషన్తి గిరో అప్రతీతమ్ ఇన్ద్రం నమస్యా జరితుః పనన్త || 10-104-07
సప్తాపో దేవీః సురణా అమృక్తా యాభిః సిన్ధుమ్ అతర ఇన్ద్ర పూర్భిత్ |
నవతిం స్రోత్యా నవ చ స్రవన్తీర్ దేవేభ్యో గాతుమ్ మనుషే చ విన్దః || 10-104-08
అపో మహీర్ అభిశస్తేర్ అముఞ్చో ऽజాగర్ ఆస్వ్ అధి దేవ ఏకః |
ఇన్ద్ర యాస్ త్వం వృత్రతూర్యే చకర్థ తాభిర్ విశ్వాయుస్ తన్వమ్ పుపుష్యాః || 10-104-09
వీరేణ్యః క్రతుర్ ఇన్ద్రః సుశస్తిర్ ఉతాపి ధేనా పురుహూతమ్ ఈట్టే |
ఆర్దయద్ వృత్రమ్ అకృణోద్ ఉలోకం ససాహే శక్రః పృతనా అభిష్టిః || 10-104-10
శునం హువేమ మఘవానమ్ ఇన్ద్రమ్ అస్మిన్ భరే నృతమం వాజసాతౌ |
శృణ్వన్తమ్ ఉగ్రమ్ ఊతయే సమత్సు ఘ్నన్తం వృత్రాణి సంజితం ధనానామ్ || 10-104-11
