అగ్రే బృహన్న్ ఉషసామ్ ఊర్ధ్వో అస్థాన్ నిర్జగన్వాన్ తమసో జ్యోతిషాగాత్ |
అగ్నిర్ భానునా రుశతా స్వఙ్గ ఆ జాతో విశ్వా సద్మాన్య్ అప్రాః || 10-001-01
స జాతో గర్భో అసి రోదస్యోర్ అగ్నే చారుర్ విభృత ఓషధీషు |
చిత్రః శిశుః పరి తమాంస్య్ అక్తూన్ ప్ర మాతృభ్యో అధి కనిక్రదత్ గాః || 10-001-02
విష్ణుర్ ఇత్థా పరమమ్ అస్య విద్వాఞ్ జాతో బృహన్న్ అభి పాతి తృతీయమ్ |
ఆసా యద్ అస్య పయో అక్రత స్వం సచేతసో అభ్య్ అర్చన్త్య్ అత్ర || 10-001-03
అత ఉ త్వా పితుభృతో జనిత్రీర్ అన్నావృధమ్ ప్రతి చరన్త్య్ అన్నైః |
తా ఈమ్ ప్రత్య్ ఏషి పునర్ అన్యరూపా అసి త్వం విక్షు మానుషీషు హోతా || 10-001-04
హోతారం చిత్రరథమ్ అధ్వరస్య యజ్ఞస్య-యజ్ఞస్య కేతుం రుశన్తమ్ |
ప్రత్యర్ధిం దేవస్య-దేవస్య మహ్నా శ్రియా త్వ్ అగ్నిమ్ అతిథిం జనానామ్ || 10-001-05
స తు వస్త్రాణ్య్ అధ పేశనాని వసానో అగ్నిర్ నాభా పృథివ్యాః |
అరుషో జాతః పద ఇళాయాః పురోహితో రాజన్ యక్షీహ దేవాన్ || 10-001-06
ఆ హి ద్యావాపృథివీ అగ్న ఉభే సదా పుత్రో న మాతరా తతన్థ |
ప్ర యాహ్య్ అచ్ఛోశతో యవిష్ఠాథా వహ సహస్యేహ దేవాన్ || 10-001-07
