సామవేదము - ఉత్తర ఆర్చికః - సప్తమ ప్రపాఠకః - ప్రథమోऽర్ధః

←ముందరి అధ్యాయము

సామవేదము (సామవేదము - ఉత్తర ఆర్చికః - సప్తమ ప్రపాఠకః - ప్రథమోऽర్ధః)

తరువాతి అధ్యాయము→

ఉత్తర ఆర్చికః - సప్తమ ప్రపాఠకః - ప్రథమోऽర్ధః - సూక్తము 1

అభి ప్ర గోపతిం గిరేన్ద్రమర్చ యథా విదే|
మూనుఁ సత్యస్య సత్పతిమ్||

ఆ హరయః ససృజ్రిరేऽరుషీరధి బర్హిషి|
యత్రాభి సంనవామహే||

ఇన్ద్రాయ గావ ఆశిరం దుదుహ్రే వజ్రిణే మధు|
యత్సీముపహ్వరే విదత్||

ఉత్తర ఆర్చికః - సప్తమ ప్రపాఠకః - ప్రథమోऽర్ధః - సూక్తము 2

ఆ నో విశ్వాసు హవ్యమిన్ద్రఁ సమత్సు భూషత|
ఉప బ్రహ్మాణి సవనాని వృత్రహన్పరమజ్యా ఋచీషమ||

త్వం దాతా ప్రథమో రాధసామస్యసి సత్య ఈశానకృత్|
తువిద్యుమ్నస్య యుజ్యా వృణీమహే పుత్రస్య శవసో మహః||

ఉత్తర ఆర్చికః - సప్తమ ప్రపాఠకః - ప్రథమోऽర్ధః - సూక్తము 3

ప్రత్నం పీయూషం పూర్వ్యం యదుక్థ్యం మహో గాహద్దివ ఆ నిరధుక్షత|
ఇన్ద్రమభి జాయమానఁ సమస్వరన్||

ఆదీం కే చిత్పశ్యమానాస ఆప్యం వసురుచో దివ్యా అభ్యనూషత|
దివో న వారఁ సవితా వ్యూర్ణుతే||

అధ యదిమే పవమాన రోదసీ ఇమా చ విశ్వా భువనాభి మజ్మనా|
యూథే న నిష్ఠా వృషభో వి రాజసి||

ఉత్తర ఆర్చికః - సప్తమ ప్రపాఠకః - ప్రథమోऽర్ధః - సూక్తము 4

ఇమమూ షు త్వమస్మాకఁ సనిం గాయత్రం నవ్యాఁసమ్|
అగ్నే దేవేషు ప్ర వోచః||

విభక్తాసి చిత్రభానో సిన్ధోరూర్మా ఉపాక ఆ|
సద్యో దాశుషే క్షరసి||

ఆ నో భజ పరమేష్వా వాజేషు మధ్యమేషు|
శిక్షా వస్వో అన్తమస్య||

ఉత్తర ఆర్చికః - సప్తమ ప్రపాఠకః - ప్రథమోऽర్ధః - సూక్తము 5

అహమిద్ధి పితుష్పరి మేధామృతస్య జగ్రహ|
అహఁ సూర్య ఇవాజని||

అహం ప్రత్నేన జన్మనా గిరః శుమ్భామి కణ్వవత్|
యేనేన్ద్రః శుష్మమిద్దధే||

యే త్వామిన్ద్ర న తుష్టువురృషయో యే చ తుష్టువుః|
మమేద్వర్ధస్వ సుష్టుతః||

ఉత్తర ఆర్చికః - సప్తమ ప్రపాఠకః - ప్రథమోऽర్ధః - సూక్తము 6

అగ్నే విశ్వేభిరగ్నిభిర్జోషి బ్రహ్మ సహస్కృత|
యే దేవత్రా య ఆయుషు తేభిర్నో మహయా గిరః||

ప్ర స విశ్వేభిరగ్నిభిరగ్నిః స యస్య వాజినః|
తనయే తోకే అస్మదా సమ్యఙ్వాజైః పరీవృతః||

త్వం నో అగ్నే అగ్నిభిర్బ్రహ్మ యజ్ఞం చ వర్ధయ|
త్వం నో దేవతాతయే రాయో దానాయ చోదయ||

ఉత్తర ఆర్చికః - సప్తమ ప్రపాఠకః - ప్రథమోऽర్ధః - సూక్తము 7

త్వే సోమ ప్రథమా వృక్తబర్హిషో మహే వాజాయ శ్రవసే ధియన్ దధుః|
స త్వం నో వీర వీర్యాయ చోదయ||

అభ్యభి హి శ్రవసా తతర్దిథోత్సం న కం చిజ్జనపానమక్షితమ్|
శర్యాభిర్న భరమాణో గభస్త్యోః||

అజీజనో అమృత మర్త్యాయ అమృతస్య ధర్మన్నమృతస్య చారుణః|
సదాసరో వాజమచ్ఛా సనిష్యదత్||

ఉత్తర ఆర్చికః - సప్తమ ప్రపాఠకః - ప్రథమోऽర్ధః - సూక్తము 8

ఏన్దుమిన్ద్రాయ సిఞ్చత పిబాతి సోమ్యం మధు|
ప్ర రాధాఁసి చోదయతే మహిత్వనా||

ఉపో హరీణాం పతిఁ రాధః పృఞ్చన్తమబ్రవమ్|
నూనఁ శ్రుధి స్తువతో అశ్వ్యస్య||

న హ్యాఙ్గ పురా చ న జజ్ఞే వీరతరస్త్వత్|
న కీ రాయా నైవథా న భన్దనా||

ఉత్తర ఆర్చికః - సప్తమ ప్రపాఠకః - ప్రథమోऽర్ధః - సూక్తము 9

నదం వ ఓదతీనాం నదం యోయువతీనామ్|
పతిం వో అఘ్న్యానాం ధేనూనామిషుధ్యసి||

ఉత్తర ఆర్చికః - సప్తమ ప్రపాఠకః - ప్రథమోऽర్ధః - సూక్తము 10

దేవో వో ద్రవిణోదాః పూర్ణాం వివష్ట్వాసిచమ్|
ఉద్వా సిఞ్చధ్వముప వా పృణధ్వమాదిద్వో దేవ ఓహతే||

తఁ హోతారమధ్వరస్య ప్రచేతసం వహ్నిం దేవా అకృణ్వత|
దధాతి రత్నం విధతే సువీర్యమగ్నిర్జనాయ దాశుషే||

ఉత్తర ఆర్చికః - సప్తమ ప్రపాఠకః - ప్రథమోऽర్ధః - సూక్తము 11

అదర్శి గాతువిత్తమో యస్మిన్వ్రతాన్యాదధుః|
ఉపోషు జాతమార్యస్య వర్ధనమగ్నిం నక్షన్తు నో గిరః||

యస్మాద్రేజన్త కృష్టయశ్చర్కృత్యాని కృణ్వతః|
సహస్రసాం మేధసాతావివ త్మనాగ్నిం ధీభిర్నమస్యత||

ప్ర దైవోదాసో అగ్నిర్దేవ ఇన్ద్రో న మజ్మనా|
అను మాతరం పృథివీం వి వావృతే తస్థౌ నాకస్య శర్మణి||

ఉత్తర ఆర్చికః - సప్తమ ప్రపాఠకః - ప్రథమోऽర్ధః - సూక్తము 12

అగ్న ఆయూఁషి పవసే ఆసువోర్జమిషం చ నః|
ఆరే బాధస్వ దుచ్ఛునామ్||

అగ్నిరృషిః పవమానః పాఞ్చజన్యః పురోహితః|
తమీమహే మహాగయమ్||

అగ్నే పవస్వ స్వపా అస్మే వర్చః సువీర్యమ్|
దధద్రయిం మయి యోషమ్||

ఉత్తర ఆర్చికః - సప్తమ ప్రపాఠకః - ప్రథమోऽర్ధః - సూక్తము 13

అగ్నే పావక రోచిషా మన్ద్రయా దేవ జిహ్వయా|
ఆ దేవాన్వక్షి యక్షి చ||

తం త్వా ఘృతస్నవీమహే చిత్రభానో స్వర్దృశమ్|
దేవాఁ ఆ వీతయే వహ||

వీతిహోత్రం త్వా కవే ద్యుమన్తఁ సమిధీమహి|
అగ్నే బృహన్తమధ్వరే||

ఉత్తర ఆర్చికః - సప్తమ ప్రపాఠకః - ప్రథమోऽర్ధః - సూక్తము 14

అవా నో అగ్న ఊతిభిర్గాయత్రస్య ప్రభర్మణి|
విశ్వాసు ధీషు వన్ద్య||

ఆ నో అగ్నే రయిం భర సత్రాసాహం వరేణ్యమ్|
విశ్వాసు పృత్సు దుష్టరమ్||

ఆ నో అగ్నే సుచేతునా రయిం విశ్వాయుపోషసమ్|
మార్డీకం ధేహి జీవసే||

ఉత్తర ఆర్చికః - సప్తమ ప్రపాఠకః - ప్రథమోऽర్ధః - సూక్తము 15

అగ్నిఁ హిన్వన్తు నో ధియః సప్తిమాశుమివాజిషు|
తేన జేష్మ ధనంధనమ్||

యయా గా ఆకరామహై సేనయాగ్నే తవోత్యా|
తాం నో హిన్వ మఘత్తయే||

ఆగ్నే స్థూరఁ రయిం భర పృథుం గోమన్తమశ్వినమ్|
అఙ్ధి ఖం వర్త్తయా పవిమ్||

అగ్నే నక్షత్రమజరమా సూర్యఁ రోహయో దివి|
దధజ్జ్యోతిర్జనేభ్యః||

అగ్నే కేతుర్విశామసి ప్రేష్ఠః శ్రేష్ఠ ఉపస్థసత్|
బోధా స్తోత్రే వయో దధత్||

ఉత్తర ఆర్చికః - సప్తమ ప్రపాఠకః - ప్రథమోऽర్ధః - సూక్తము 16

అగ్నిర్మూర్ధా దివః కకుత్పతిః పృథివ్యా అయమ్|
అపాఁ రేతాఁసి జిన్వతి||

ఈశిషే వార్యస్య హి దాత్రస్యాగ్నే స్వఃపతిః|
స్తోతా స్యాం తవ శర్మణి||

ఉదగ్నే శుచయస్తవ శుక్రా భ్రాజన్త ఈరతే|
తవ జ్యోతీఁష్యర్చయః||