ఈ పుట అచ్చుదిద్దబడ్డది
చాచు - చాటు 699 చాటు - చాడీ
చాచు
- చేయి చాచి అడుగు, అర్థించు. దాశ. 96.
చాట బంచు
- చాటింపు వేయించు.
- "సకలజనులకుఁ బయనంబు చాటఁ బంచి." జైమి. 2. 106.
చాటభారతము
- అనంత మైన ప్రసంగము. తొలిరోజులలో పెద్దసైజులో భారతం వగైరాలు అచ్చు వేసేవారు, అవి చేటవలె పెద్దవి కనుక చేటభారతములు అని అలవా టయినవి. అవి పెద్దవి కూడా కనుక యెక్కువ అన్న అర్థంలో పలుకుబడి అయినది.
- "నీ చాటభారత మంతయు వినుటకు నాకు దెఱపి లేదు. గాని ముచ్చి మూడు మాటలలోఁ జెప్పఁ గలిగితివా చెప్పుము." వా.
- చింతా. 7. అం. 68. పు.
- చాటుభారత మని మార్చి కొందఱు అర్థం చెప్పుట సరి కా దనిపించును.
చాటు చేయు
- మఱుగుపఱచు.
- "చాటు చేసిన నేమి చక్రవాకులఁబోలు, పాలిండ్లమెఱుఁగులు బయలు పడియె." క్రీడా. 95.
చాటుపడు
- మఱుగుపడు.
చాటు మాటున
- చాటున.
- "...అడంగెఁ కీఁకటుల్, గొందుల సందులన్ గుహల గుట్టలఁ బుట్టల చాటు మాటునన్." అని. 3. 85.
చాటు మాటు లేక
- గుట్టు గోప్యము లేక - బహిరంగంగా.
- "చాటు మాటు లేక తేట తెల్లంబుగా, నబ్బోటితోఁ జాటం దొడంగె." చంద్రరేఖా. 2. 8.
చాటువడు
- మఱుగుపడు.
- "తురగములు నీరుగొను నవసరము నేతెంచె మనము చాటువడుదము." జైమి. 29.
చాడికత్తె
- చాడీలు చెప్పునది.
చాడికాడు
- చాడీలు చెప్పువాడు.
చాడి చెప్పు
- ఒకరిపై కొండెములు చెప్పు.
- "చాడి చెప్పిన మనవిగా సంగ్రహించు." రాజగో. 3. 17.
- "వాడికి వాళ్లమీదా వీళ్లమీదా చాడీలు చెప్పడమే పని." వా.
- చూ. చాడీకోరు.
చాడీకోరు
- చాడీలు చెప్పువాడు.
