2
కాశీమజిలీకథలు - ఎనిమిదవభాగము.
స్వామీ ! అల్లుఁడు గోడలగుట చిత్రము కాదా ? దానిభావంబు వివరింపుఁడు. తెలిసికొని యాపండితులకుం జెప్పెద. మఱియు నీగ్రామమునం గలవిశేషంబుల సొంతముగాఁజూచి వచ్చెద ననియడిగిన నయ్యతిపతి రత్నప్రభావంబునఁ దదుదంత మాకలించుకొని గోపా ! యీశ్లోకపాదమువలన నద్భుతకథాసందర్భగర్భితం బగుసప్తమిత్రచరిత్ర మనునుపాఖ్యానము స్ఫురించుచున్నది. అది నీ వింతకు మున్ను విన్నకథలకన్నఁ జాల చమత్కారముగా నుండు నవహితుండవై యాలకింపుము.
- దత్తుని కథ. -
సీ॥ తెలితమ్మిపూవురే ◆ కులమించు సోగ క
న్నులు మోమునకువింత ◆ చెలువుగూర్ప
నరచందరుని మేల ◆ మాడునెన్నుదుట ది
ద్దిన విభూతులబ్రహ్మ ◆ తేజమెదుగ
నీర్కావివలువ వ ◆ న్నియకుందనమువంటి
యొడలిచాయకుఁగ్రొత్త ◆ యొఱపుగొలుప
బహుళ శాస్త్రామ్నాయ ◆ పఠనచిహ్నితములై
యోష్ఠముల్ దీప్తి సం ◆ యుక్తి నెసఁగ
గీ. నవనిఁ గుమ్మఱవచ్చిన ◆ యతనుఁడో జ
యంతుఁడొ కుబేరపుతుఁడో ◆ యబ్జుఁడో వ
సంతుఁడో యనఁదగి బ్రహ్మ ◆ చారి యౌవ
నాంకురాలంకృతాంగ కుం ◆ డైనవాఁడు.
ఒకానొక బ్రాహ్మణ కుమారుండొక మహారణ్య మధ్యంబున వసించి యిట్లుతలంచెను.
ఆహా ! నేను గాశీపురంబునుండిబయలుదేరి యిరువది దినములైనది. మొదటనాలుగైదు పల్లెలు మాత్రము గనంబడినవి. తఱువాత
