నిలయరజతోత్సవమునకు హనుమకొండ వెళ్లి యున్నపుడు, ప్రజానురంజకులును, విద్యాప్రియులు నగు నక్కడి సుబేదారు ఆలి జనాబు మోల్వీ అబ్దుల్ బాసిత్ ఖానుగారు ఒక గ్రంథాలయమును స్థాపించనున్నారని వినియుంటిని. వారు ఇట్టి ఆదర్శపూర్వకమైన గ్రంథాలయమును స్థాపించి యితరులకు మార్గదర్శకులయ్యెదరని నమ్ముచున్నాను.
పైన సూచింపబడిన విషయములు ప్రభుత్వపక్షమునగాని, ప్రజాపక్షమనగాని ఎంతవర కవలంబింపబడవో అంతవరకు మనము విద్యావిషయమున వెనుకకు నడచుచున్నామని చెప్పవచ్చును. మనకొఱకై విజ్ఞానము నార్జించి, మన ప్రభుత్వము కొన్ని గ్రంథములలో దాచి మనకు పంచకజ్జాయమువలె బంచిపెట్టునవి యనుకొనుట మన వివేకితా శూన్యమున కొక నిదర్శనము. మనము మన కాళ్లపైననే నిలబడవలసియున్నది.
గ్రంథాలయాభివృద్ధి
(శ్రీ అయిత రాజు జీడికంటి రామారావుగారు)
విద్యకు వికాసమును గల్పించునవి గ్రంథాలయములు. గ్రంథాలయములు భాషాపయుక్తములు. దేశాభివృద్ధికి భాషాభివృద్ధియే ముఖ్యసాధనము. భాషా సమన్వితములగు వివిధవిజ్ఞాన ప్రాబోధగ్రంధ రాశితో భాసిల్లునవి గ్రంథాలయములు. ఈలాటి గ్రంథముల బఠించుటవలన మానవున కనేక విషయములందు తెలివి తేటలు గలిగి, అనుభవవిజ్ఞాన సంపత్తి చేకూరనున్నది గావున నీ గ్రంథాలయములు గ్రామ గ్రామమున నెలకొల్పబడు టధికావశ్యకము. దీని వ్యాపనకై యిదివరకు కేంద్ర సంఘము వారు చాల కృషిసల్పి జిల్లాలలో నూటముప్పదిదాక గ్రంథాలయముల నెల కొల్పించిరిగాని యవిగూడ నిప్పుడు మందగించియున్నవి. కొన్ని గ్రంథాలయము లంతరించినవి. కావున వీని పునరుద్ధరణకును, నూతన గ్రంథాలయ స్థాపనకును, గ్రంథాలయోపయోగమును బోధించుటకును విశేషప్రచారము మరలు సాగించుటకును ప్రయత్నించవలసియున్నది. ఈ గ్రంథాలయోద్యమమునకు సరియైన ధనసహాయము లభించక పోవుటవలన నీయుద్యమము తగ్గిపోవుచున్నది.
పాఠశాలలకువలె గ్రంథాలయ వ్యాప్తికిని, వాసిపోషణకును కొంతమొత్తము పభుత్వము వారు వినియోగించినచో విద్యాభివృద్ధికై సమగ్ర ప్రయత్న మొనర్చిన దానిలో జేరును.
గ్రంథాలయ స్థాపనా వ్యయమును భరింపజాలని పల్లెలలో విజ్ఞానవ్యాప్తికై సంచార గ్రంథాలయముల నేర్పరచి తద్వారా విద్యాప్రచారము సులభముగా జేయవచ్చును.
- ↑ నిజాంరాష్ట్ర తృతీయాంధ్ర మహాజనసభ ఆహ్వాన సంఘాధ్యక్షులుగ ఇచ్చిన యుపన్యాసమునుండి
