Jump to content

పుట:Dashavathara-Charitramu.pdf/96

వికీసోర్స్ నుండి
ఈ పుట అచ్చుదిద్దబడ్డది


ఉ.⁠

ఇం కిట దోఁపె కాక పుర మెయ్యది నీకు నిశాచరేంద్ర యీ
యంకము మాని పోయిన యథార్థమె పల్కితి వౌర యంచు
నిశ్శంకత నిర్జరేశ్వరుఁడు సారెకుఁ బ్రల్లదమాడఁగా మహా
హంకృతిఁ జెంత నున్నబలియయుం దనుజాతుఁడు హుంకరించుచున్.

⁠ 403


తే.⁠

ఏమిరా యింద్ర యింతలో నింతగర్వ, మేల వచ్చెఁ దలంపరా యిన్నినాళ్లు
నీవు పడినట్టిపాటు నే నెఱుఁగుదు నొక, గరిడిలో వింతసాధన క్రమముగాదు.

⁠ 404


తే.⁠

ఇతఁడు నీ కోడి మాయలు నిచటఁ జేసె, నే స్వకాండ విజృంభణం బెల్లఁ దొలఁగ
గౌతమీజార యెవ్వనిఁగాఁ దలంచి, నావు బలిఁ గాఁడె పుణ్యజనప్రభుండు.

⁠ 405


ఉ.⁠

కొమ్ములుఁ దోక లేక జతగూడెను నీకు వృషాఖ్య యింద్ర రే
ద్రిమ్మరిదొమ్మికయ్యమున జట్టతనం బరి పూరి మేసితోఁ
గ్రమ్మినభీతిచే నటులుగావలె నచ్చెరువేల దీనికై
యిమ్మహి నీదుపేరిపసు లెచ్చటఁ జూచినఁ బూరి మేయఁగన్.

⁠ 406


క.⁠

కౌశికలీలను గానన, కౌశికమూలమునఁ దపము గావించెదవో
కౌశిక యటు గాకున్నం, గౌశికగతి గొంది నడఁగఁ గాంక్షించెదవో.

⁠ 407


క.⁠

బలి భాస్వత్తేజంబున, నళుకుచు నిఁకఁ గౌశికా మహాబిలపదవి
న్మెలఁగు యథార్థాభిఖ్య, న్వలవదు మాతోడఁ బోర వశమే నీకున్.

⁠ 408


వ.⁠

అనిన మదిరాపానఖదిరాంగారసదృశదృశుం డగుచు సహస్రదృశుం డిట్లనియె.

⁠ 409


తే.⁠

కౌశికుఁడ నౌదుఁగాక రాక్షస యటైనఁ, గౌశికస్ఫూర్తి బలిపుష్టగణము లెట్లు
మనఁగ నేర్చు నెఱుంగ వేమనఁగవచ్చు, ననిన విని నవ్వి బలి యిట్టు లనియె నపుడు.

⁠ 410


సీ.⁠

విబుధలోకేంద్రుండు వీరాధివీరుండు గాఁడె యెన్నండైనఁ గలన నోడి
పోవునె యటమొన్న పుణ్యంబునకు స్వర్గ మిచ్చి తా నడవుల కేగెఁగాక
మరల నెయ్యంబున మముఁ గొల్చెఁ గాఁబోలు ఘనభుజాశక్తికిఁ గడమగలదె
యింకఁ దాఁగాక న న్నెవ్వరు నవ్వెద రాహవంబున నోడి యరుగుచుండ

⁠


తే.⁠

నహహ యందుల కేమి కర్మానుసార, మాపదలు సంపదలు జయ మపజయంబు
దానికన లేదు దైవకృత్యంబులకును, విఱ్ఱవీఁగుట వ్రేఁగుట వెఱ్ఱితనము.

⁠ 411


క.⁠

వినవోయి యింద్ర దైవం, బనుకూలంబైనఁ గలుగు నన్నిశుభంబుల్
దనకుఁ బ్రతికూలమైన వ, చ్చిన నేకార్యంబుఁ గాదు సిద్ధము సుమ్మీ.

⁠ 412


ఉ.⁠

మీ కొకవేళ నేమమగు మే మొకవేళఁ ద్రిలోకరాజ్యముం
జేకొనియుందు మిర్వురకుఁ జేకుఱ వొక్కట వాంఛితార్థముల్
కోకచకోరకంబులకుఁ గూడునె కోరిక లొక్కవేళనే
యాకరణిం దలంపు త్రిదళాధిప గర్వపుమాట లేటికిన్.

⁠ 413