పుట:Andhra-Sri-Vishnu-Puranamu.pdf/57

మ.⁠

అమితక్రోధపరీతుఁ డైనమునిచే నాక్షిప్తతేజస్కుఁడై భ్రమతం జెందినమోముతోడఁ బంతప్తస్వాంతుఁడై బాష్పపూ రము లొక్కుమ్మడిఁ గన్నులం దొరఁగ నారాటించుచున్ వేఱుపా యముఁ జింతించియుఁ గాన కొక్కరుఁడ పోయెన్ వీటికిన్ దీనుఁడై.[1]

⁠ 147

ఉ.⁠

ఆమఘవుండు గన్గొనఁగ నచ్చరలేములుఁ గల్పవృక్షచిం తామణికామధేనుసితదంతితురంగమకోశముఖ్యనా నామహనీయసంపదలు నాశములయ్యెను నింద్రజాలవి ద్యామయమయ్యెనో యనఁగ నయ్యమరావతి యుండె శూన్యమై.[2]

⁠ 148

సీ.⁠

మునిశాపదోషంబు ముట్టియుండుటఁ జేసి దానధర్మములు భూస్థలిఁ దొఱంగె దానధర్మములు భూస్థలిఁ దొఱంగుటఁ జేసి వివిధదేశము లనావృష్టిఁ బొందె వివిధదేశము లనావృష్టిఁ బొందుటఁ జేసి సస్యంబు లెల్ల నాశంబు నొందె సస్యంబు లెల్ల నాశంబు నొందుటఁ జేసి ధనధాన్యములసొంపు దఱిఁగిపోయెఁ

⁠

తే.⁠

బుడమి ధనధాన్యములసొంపు చెడినకతన, యజ్ఞకర్మంబులెల్లను నణఁగిపోయె యజ్ఞకర్మంబు లణఁగిన నమరవరుల, కెల్లఁ దేజోబలంబులు పొల్లువోయె.[3]

⁠ 149

వ.⁠

ఇట్లు సర్వంబు నిశ్శ్రీకంబయ్యె నప్పుడు.[4]

⁠ 150

ఉ.⁠

శ్రీమహనీయసంపదలఁ జెందక యుండుటఁ జేసి సాత్వికం బేమియు లేకపోవుటఁ జూమీ మఱి రాజసతామసంబులుం గామము గ్రోధలోభములు గల్గి మనుష్యులు క్రూరకర్ములై క్షామజరాదిరోగములక్రందున నాశముఁ జెంది రెంతయున్.[5]

⁠ 151

వ.⁠

ఇవ్విధంబునం బాకశాసనప్రముఖదేవగణంబులు ధైర్యశౌర్యతేజోబలశూన్యు రప్పుడు.

⁠ 152

చ.⁠

అమరపురంబుమీఁదఁ జతురంగబలంబులఁ గూడి విప్రజి త్ప్రముఖనిశాచరుల్ చని యపారపుసంపద లెల్లఁ గొల్లలా డి మఘవుమీఁద సంగరపటిష్ఠతఁ జూపిన నాతఁ డుగ్రశౌ ర్యము పఱివోయి యొక్కఁడుఁ బరాజితుఁడై చనియెన్ భయంబుతోన్.[6]

⁠ 153

1. అమితక్రోధపరీతుఁడు = అధికమైన కోపముచేత ఆక్రమింపఁబడినవాఁడు, ఆక్షిప్తతేజస్కుఁడు = ఆక్షేపింపఁబడిన తేజస్సుగలవాఁడు, ఆరాటించుచు = ఆరాటపడుచు, వీటికిన్ = పట్టణమునకు.
2. మఘవుఁడు = ఇంద్రుఁడు, అచ్చరలేములు = అప్సరస్త్రీలు, సీకదంతి = తెల్లయేనుఁగు - ఐరావతము, కోశము = బొక్కసము.
3. ముట్టి = ఆక్రమించి, అనావృష్టి = వఱపు, సొంపు = బాగు - పంట యనుట.
4. నిశ్శ్రీకము = సంపద లేనిది.
5. క్షామజరాదిరోగములక్రందునన్ = కఱవు ముసలితనము మొదలైన రోగములసందడిచేత.
6. మఘవుమీఁదన్ = ఇంద్రునిమీఁద, సంగరపటిష్టత = యుద్ధమునందలి నేర్పును, పఱివోయి = కొల్లపోయి - అడఁగి.