పుట:Andhra-Sri-Vishnu-Puranamu.pdf/255

శ్రీరస్తు

శ్రీవిష్ణుపురాణము

షష్ఠాశ్వాసము

⁠

జనకజనకనిభవి భ్రాజితగాంభీర్యసామరస్యవివేక వ్యాజజగనబ్బగండ వి రాజితకరుణాకలాప రాఘవభూపా.[1]

⁠ 1

వ.⁠

సకలపురాణవిద్యాధురంధరుం డైనపరాశరుండు మైత్రేయున కిట్లనియె.

⁠ 2

చంద్రవంశపురాజులచరిత్రము

.

ఆ.⁠

అఖిలమునకు స్రష్టయైననారాయణు, నాభిసరసిజమున నలినభవుఁడు జనన మొందె నతని కొనర మానసవుత్రుఁ, డై జనించి మించె నత్రిమౌని.[2]

⁠ 3

క.⁠

అత్రిమునీంద్రుని దక్షిణ, నేత్రంబున నుదయమయ్యె నిర్మలతేజో గాత్రుఁడు సుధాకరుఁడు శత, పత్రభవాంశంబుఁ దాల్చి బంధురయశుఁడై.[3]

⁠ 4

క.⁠

బాల్యమున నతఁడు మతిచాం, చల్యం బొకయింతలేక సమధికనిష్ఠా కల్యాత్ముం డగుచును బా, హుళ్యం బగుతపము పద్మయోనికిఁ జేసెన్.[4]

⁠ 5

క.⁠

వృక్షలతౌషధితతులకు, నక్షత్రంబులకు ద్విజగణంబుల కమృత ప్రేక్షణకిరణములకు న, ధ్యక్షుఁడుగా వరముఁ గొనియె నబ్జజువలనన్.[5]

⁠ 6

వ.⁠

మఱియు రాజసూయాదిమహాయజ్ఞంబులు సేసి సర్వోత్కృష్టం బైనగృహి త్వంబుఁ గైకొని యమ్మహనీయవైభవంబున నశ్విన్యాదు లైనదాక్షాయణుల నిరువదియేడుగురి వరియించి వారివలన నభిమతభోగము అనుభవించుచు మన్మ థాకారం బైనసౌకుమార్యంబునం బెరుగుచుండి.[6]

⁠ 7

1. శ్రీజనకజనకనిభవిభాజికగాంభీర్యసామరభ్యవివేక = లక్ష్మీదేవికి తండ్రియైన సముద్రుని బోలి ప్రకాశించునట్టి గంభీరభావంబును జనకచక్రవర్తిని బోలి ప్రకాశించునట్టి సామరస్యముతోడి వివేకంబును గలవాఁడా, జగనబ్బగండ = ఇది బిరుదుమాట, విరాజితకరుణాకలాప = ప్రకాశించునట్టి దయయే ఆభరణముగాఁ గలవాఁడా.
2. స్రష్ట = సృష్టికర్త.
3. శతపత్రభవాంశంబునన్ = బ్రహ్మయొక్క అంశమును, బంధుర = అధికమైన.
4. సమధికనిష్ఠాకల్యాత్ముఁడు = మిక్కుటమైననిష్ఠతో శుభస్వరూప(నిర్మల)మైన మనసు గలవాఁడు, పద్మయోనికిన్ = బ్రహ్మను గూర్చి.
5. అమృతప్రేక్షణకిరణములకున్ = అమృతమును చిలుకుచున్నకిరణములకును.
6. గృహిత్యము = గృహస్థునితనము, దాక్షాయణులన్ = దక్షునికూఁతులను.