పుట:Andhra-Sri-Vishnu-Puranamu.pdf/239

వ.⁠

అంత నతీతానాగతవర్తమానకాలత్రయవిజ్ఞానవిద్యాఖర్వుం డైనయౌర్వుండు నిజాశ్రమంబు వెలువడివచ్చి యయ్యంబుజాక్షి నగ్నిప్రవేశంబు చేయకుండ నివారించి యిట్లనియె.[1]

⁠ 229

క.⁠

సుదతీ యేటికి సొద సొ, చ్చెదు నీయుదరంబులోనిశిశువు విరోధి ప్రదముఁడు వీర్యపరాక్రముఁ, డుదితార్కసమానుఁ డుర్వి యొక్కడ యేలున్.[2]

⁠ 230

తే.⁠

సకలయజ్ఞంబులును జేసి చక్రవర్తి, యై యనేకకుమారులు నర్థిఁ గాంచి వంశకరుఁ డగుఁ గావున వలదు నీకు, నింతసాహస మన్న నయ్యిందువదన.

⁠ 231

క.⁠

మరణంబు మాని పతికిం, బరలోకక్రియలు సేసి పరమానందో త్కరమతితో నమ్మౌనీ, శ్వరునాశ్రమభూమియందు వర్తించుతఱిన్.

⁠ 232

క.⁠

కతిపయదినములలో న, య్యతివ గరముతోడఁగూడ నాత్మజుఁ గనినన్ ధృతి నౌర్వుఁడు సగరుండని, యతనికి నామంబు చేసె నర్హస్థితితోన్.

⁠ 233

వ.⁠

జాతకర్మాదిక్రియలు నిర్వర్తించి పెంచి చౌలోపనయనాదికృత్యంబు లుదాత్తం బులుగా నడపి వేదశాస్త్రపురాణంబులం బ్రవీణుంజేసి యనేకశాస్త్రశిక్షాదక్ష విద్యలు దెలిపి రథాశ్వగజారోహణాదు లైనరాజవర్తనంబుల నేకొఱంతయు లేకుండ శిక్షించె. ఇట్లు కృతకృత్యుండై సగరుండు జననికడకుం జనుదెంచి యొక్కనాఁ డిట్లనియె.[3]

⁠ 234

క.⁠

జననీ యడవుల నుండఁగ, మన కేటికి నెందుఁ బోయె మజ్జనకుఁడు నా విని తల్లి పుత్రుతోడను, మునుకొని కన్నీరు దొరుఁగ మొగి నిట్లనియెన్.

⁠ 235

క.⁠

తనయా యేమని చెప్పుదు, ననిలోపల హైహయాదు లగురాజులు మీ జనకుని గెలిచి సమస్తముఁ, గొని పాఱఃగఁ దోలి రిట్టి ఘోరాటవికిన్.

⁠ 236

వ.⁠

అని పలికి సవతి తనకు గర్భస్తంభం బగునట్లుగా విషంబుఁ బెట్టుటయును వార్ధకం బున రాజు పరలోకగతుం డగుటయు నౌర్వుప్రసాదంబునఁ దమకు సకలరాజ్యం బును దొల్లింటియట్ల యనుభవింపగలుగుటయునుం జెప్పినఁ గోపించి.

⁠ 237

చ.⁠

మదమునఁ దండ్రిరాజ్యము సమస్తముఁ గొన్న విరోధివర్గమున్ గదనములోనఁ జంపి త్రిజగంబునఁ గీర్తి వెలుంగునట్లు చే నెద ననుచుం బ్రతిజ్ఞ దగఁ జేకొని హైహయవంశరాజులం బొదివి నిశాతఘోరశరపుంజముల న్వధియింప బల్విడిన్.[4]

⁠ 238

వ.⁠

అంత శకయవనకాంభోజపారదప్లవాదిదేశంబులరాజులు ప్రాణభయార్తులై తత్కులగురుం డైనవసిష్ఠు శరణు చొచ్చిన నమ్మునీంద్రుండు వారల నిజకులాచార ధర్మంబులు విడిపించి జీవన్మృతులం జేసి సగరున కిట్లనియె.[5]

⁠ 239

1. అఖర్వుఁడు = గొప్పవాఁడు.
2. ప్రదముఁడు = లెన్సగా ఆణఁగఁగొట్టువాఁడు.
3. ఉదాత్తంబులుగాన్ = ఘనములుగా.
4. పొదివి = ఆక్రమించి, నిశాతఘోరశరపుంజములన్ = చురుకుగల భయంకరములైన బాణసమూహములచేత, బల్విడి = అతిశౌర్యముతో.
5. జీవన్మృతులన్ = బ్రతికియు చచ్చినవారినిఁగా.