ఉమర్ ఖయ్యామ్
53
208
కోపము నిన్నుఁ బట్టుకొనకుండఁగ దుఃఖము నిన్ను జన్మసం
తాప దవాగ్ని వ్రేల్పఁగ వ్యధన్ జెడకుండ, ధరిత్రికొంగులో
గాఁపుర ముండుకోఁ దలఁచు కాలము పైఁబడకుండ, శీధువున్
రేపవ లారగింపుము సరిత్తట శాద్వలపుణ్యభూములన్.
209
ఱేపె వియోగ మాఱును ; నదృష్టసుమంబులు వీడనున్న వీ
మాపు ప్రశాంతమై వెలయు మద్యము ద్రావెడువేళ వచ్చె నీ
వైపు ప్రసన్నయై వెలఁది పాడుచు నున్నది యిట్టిసౌఖ్య మి
ప్డే పడయంగలేనియెడ నెప్పుడు పొందెదవో వచింపుమా.
210
పువ్వులఁబోలు నట్టి పువుబోణులనే జతగూడ నెంతు ; నే
రవ్వయినన్ సురాసవము గ్రాలెడుపాత్రలఁ గేలఁ దాల్తు ; నీ
జవ్వన మీశరీరమున జాఱకమున్నె ప్రపంచసౌఖ్య మే
నెవ్విధినైన నేఁ డనుభవించెద ; ఱేపు నశింపకుండగన్.
211
చారు నదీతటంబులను, సైకతసీమల, శాద్వలంబులన్
జేరి, జగంబు మై మఱచి శీధువు గైకొని సంచరింపు ; మీ
ధారుణి జీవితంబు సుమదామముకైవడి మూడునాళ్ళదై
జాఱును గాన నవ్వుచునె సాగుము పుల్లసుమాళిఁ బోలుచున్.
