పుట:హంసవింశతి.pdf/83

ప్రథమాశ్వాసము

భాగవత స్తుతి

తే.⁠

ఆత్మఁ బ్రహ్లాద రుక్మాంగదాంబరీష శౌనక వ్యాస శుక పరాశర విభీష ణార్జున వసిష్ఠ పుండరీకాఖ్య భీష్మ దాల్భ్య నారదముఖ్యులఁ దలఁతు భక్తి.

⁠ 9

సుకవి స్తుతి

సీ.⁠

వాక్యనిర్జితశేషవాల్మీకి వాల్మీకి             హరిభక్తియుక్తిధీవ్యాసు వ్యాసు ఘనభావకాళిదాసును గాళిదాసును             జారుమాధుర్యవాచోరుఁ జోరు దివిజేంద్రధనదవైభవభూతి భవభూతి             ధర్మబుద్ధినవీనదండి దండిఁ గవితాభ్రహృష్టమాధవమయూరు మయూరు             భాసరాకృతిపుష్పబాణ బాణు

⁠

తే.⁠

మానితాచార మథితాసమాఘు మాఘు ధ్యానబద్ధమురారి మురారి గాత్ర పటువిభారవి భారవిఁ బ్రస్తుతింతు సర్వశబ్దార్థవిజ్ఞానసరణి కొఱకు.

⁠ 10

ఉ.⁠

నన్నయభట్టు భీమకవినాథునిఁ దిక్కనసోమయాజిఁ బె ద్దన్నను ముక్కుతిమ్మనసచివాగ్రణి బమ్మెరపోఁతరాజు గౌ రన్నను రంగనాథుని మహామహుఁ బిల్లలమఱ్ఱి వీరభ ద్రు న్నుతియింతు నాంధ్రకవిరుద్రుల సత్కరుణాసముద్రులన్.

⁠ 11

ఉ.⁠

అయ్యలరాజుఁ దిప్పసచివాగ్రణిఁ బర్వతరాజు రామభ ద్రయ్యను భాస్కరాగ్రణిఁ బ్రధానవరుండగు కొండధీరునిన్ జయ్యనఁ దిమ్మయప్రభుని సత్కవితారచనాఢ్యులైన మా యయ్యలరాజవంశజుల నాదికవీంద్రుల సన్నుతించెదన్.

⁠ 12