అట్టి యతిథికి ఋషభాసతియందు [1]నిషధుండగు కుశేశయుం డుదయించె. అతనికి
[2]వాసవియతి యను భామయందు నలుండు సంభవించె అన్నరేంద్రునకు నభుండు,
నమ్మహీపతికిఁ బుండరీకుండు, నానృపాలునకు క్షేమధనుండు, నాభూభర్తకు వశంవదుండు,
నాధరణీధవునకు నహీనజుండు, నారాజచంద్రునకుఁ బారియాత్రుండు, నాజనపాలునకుఁ
బద్మకాంతయందు శీలుండు, నానృపోత్తమునకు సునాభుండు, నాక్షోణీవిభునకు వజ్రుండు,
నారాజన్యునకు శంఖుండు, నాపార్థివునకు హరిదశ్వుండును గ్రమంబున జనియించిరి,
ఆహరిదశ్వుండు భుజాబలంబున సమరతలంబుల ననేకరిపుకులంబులం బొలియించి,
హయమేధాది వివిధాధ్వరంబు లొనర్చి, దీప్త యను భార్యయందు విశ్వసహుండను
తనూభవుని గనియె. అతనికి హిరణ్యనాభుండు వొడమె. ఆమండలేశ్వరునకుఁ గౌసల్యుం
డవతరించె. ఆమహాత్మునకు సోమనృపాలుం డుద్భవించె. ఆక్షత్రియోత్తమునకు బ్రహ్మిష్ఠుం
డుత్పన్నంబయ్యె. ఇట్లు మహావీరులగు సూర్యవంశసంభవు లనేకులు గలరు. అట్టి సూర్య
వంశంబు చతుర్వింశతిభేదంబులం బ్రవర్తించె. ఇంక , సోమవంశప్రకారంబు వివరించెద
నాకర్ణింపు మని రోమశుం డిట్లనియె.
