పుట:వరాహపురాణము (హరిభట్టు).pdf/234

138

వరాహపురాణము

చ.⁠

సరసిజనాభ! నీచరణసారసభక్తివిహీనులైన [1]దు ష్పురుషులు వేదమార్గములఁ బోవక, దారసుతాదిసక్తులై దురితము లాచరించి, తుద దుర్గతిఁ బొందుదు, రెంతవారలుం బరమవివేక! నీమహిమ మపారము ముట్టనెఱుంగనేర్తురే?

⁠ 161

తే.⁠

అఖిలలోకేశ! పారపర్యంతరూప | పారపారగ! వారిజపత్రనేత్ర! విశ్వ[2]రూప! నమోస్తుతే వేదవినుత! | పాహి [3]నస్త్రాహి దేవ! శేషాహిశయన!

⁠ 162

చ.⁠

అని వినుతింపుచుం ప్రణతులై హరికిన్, శిశుపాలముఖ్యదు ర్జను లుదయించి, పద్మజవరంబున నున్మదులై, జగత్త్రయం బునకు నొనర్చు బాధవిధమున్ వినిపించినఁ జూచి, యా సనా తనుఁడగు వేల్పుఱేఁడు ప్రమదంబున వారలతోడ నిట్లనున్.

⁠ 163

సీ.⁠

అంబుజాసనదత్తమగు వరంబున మదో | [4]న్మాదులౌ శిశుపాలకాదిదనుజ వీరుల బాధించువిధ మెఱుంగుదు, వారు | సమకాలమునఁ గాని సమసిపోరు, పదఁడు, నిర్జరులు గోపాలకులయ్యును, | సురకామినులు గోపతరుణులయ్యు, నామ్నాయములు గోసహస్రంబులయ్యును | మేదినిమిఁద జన్మింపుఁ డిపుడ,

⁠

తే.⁠

యంత, యదువంశమందుఁ గృష్ణాహ్వయమున | భువనరక్షాపరుండనై యవతరించి, దనుజవంశంబు [5]నున్మూలితంబు చేసి, | యెల్లి నేఁటనె భూభారమెల్ల డింతు.

⁠ 164

వ.⁠

అని, దనుజాంతకుం డంతర్ధానంబు నొందె. వాసవాదులు నిజనివాసంబున కరిగి, నారాయణోపదిష్ట ప్రకారంబున, నిజాంశంబుల గోపాలకులయ్యు, నమరకామినులు గోపిక లయ్యును, నిగమంబులు గోగణంబులయ్యును సంభవించిరి. తత్సమయంబున.

⁠ 165

సీ.⁠

విను ముగ్రసేననందనుఁడు కంసుం డను | వాఁడు, సోదరియైన వనజ[6]ముఖిని, దేవకి యను నామధేయంబు గలదాని, | వసుదేవుఁ డను యదువంశజునకుఁ బరిణయం బొనరించి, బహుపదార్థము లిచ్చి, యత్తవారింటికి [7]ననుపఁదలఁచి, యరదంబుపై వధూవరుల నెక్కించి, తా | సారథియై నిల్చి, తేరు గడపి ,

⁠

తే.⁠

నిరుపమోత్సాహభరితుఁడై యరుగుచున్న | యవసరంబున వినువారి కద్భుతముగఁ, గంసునకుఁ గర్ణశూలంబు గాఁగ, నభ్ర | వాణి యిట్లని పల్కె దుర్వారఫణితి.

⁠ 166

1. తత్పురుషులు - తా
2. నాథ - మ,మా, తి, తీ, హ,ర,క; నేత - త
3. మాం పాహి దేవేశ పాహిశయన - తా
4. ద్ధారులై - మ, తా, తి, ర; ద్గారులై - హ
5. నిర్మూలితంబు - తా,తీ
6. నేత్ర - తీ
7. నంప - తి