| మ. |
తిరుగ న్వారిధి దాఁటి, రాఘవధరిత్రీనాథచూడామణిం
గరమర్థిం గని, 'కంటి సీత' ననుచుం గల్యాణవార్తాపుర
స్సరభావంబున, నింతిచేఁ గొనిన భాస్వద్రత్న [1]మర్పించి, తా
ధరణిం జాఁగిలి మ్రొక్కి నిల్చిన, మహోత్సాహంబుతో రాముఁడున్.
| 141
|
| ఉ. |
ప్రాణము ప్రాణమైన ప్రియభామిని మంగళవార్త దెచ్చి, నా
ప్రాణము నిల్పి, లోకమున భానుకులోద్ధరణప్రసిద్ధపా
రీణుఁడవైతి, తావకచరిత్ర [2]1విచిత్రమటంచు నా జగ
త్ప్రాణకుమారునిం బొగడి, పల్మఱుఁ గౌఁగిటఁ జేర్చి, యత్తఱిన్.
| 142
|
| క. |
భానుసుతానీతములగు | వానరసైన్యములతోడ వసుధ చలింపం
గా [3]నరిగి, వార్ధిఁ గట్టి, చ | మూనివహము సేతుమార్గమున దాఁటుటయున్.
| 143
|
| సీ. |
శరణాగతత్రాణబిరుదవిఖ్యాతుఁ డా | జానకీపతి, విభీషణుఁడు వచ్చి
మఱువుచొచ్చినఁ గాఁచి, మహిమ లంకాపుర | ప్రాకారముల చుట్టు వార [4]విడిసి,
కుంభకర్ణుని శౌర్యజృంభణంబు హరించి, I నారాచముల మేఘనాదుఁ గూల్చి,
దశకంఠకంఠకాంతారంబు నిజబాణ | [5]వితతిదావాగ్ని కాహుతి యొనర్చి,
|
|
| తే. |
జయము గొని, సీతతోడ లక్ష్మణునితోడఁ | బుష్పకారూఢుఁడై సైన్యములు భజింప
సురలు జయపెట్ట, నలరులసోన గురియఁ | దిరిగి రాముఁడు సాకేతపురికి నరిగె.
| 144
|
| వ. |
ఇవ్విధంబున జయవిజయులు రెండవజన్మంబున రావణకుంభకర్ణులై, రాఘవేశ్వరు
బాణంబులచేత ప్రాణంబులం బాసి, మూఁడవజన్మంబున ద్వాపరయుగంబునందు దౌవారికులు
శిశుపాలదంతవక్త్రులై జనియించి, లోకకంటకులై వర్తించుచున్న సమయంబున.
| 145
|
కృష్ణబుద్ధకల్క్యవతారకార్యములు
| చ. |
జలరుహలోచనుండు, హరి, సాధుజనావనశాలి, దేవతా
తిలకము, కృష్ణనామమున దేవకిగర్భమునం జనించి, య
చ్చలమునఁ గంస కేశి ముర సాల్వులతో శిశుపాల దంతవ
క్త్రులఁ దెగటార్చి, గోపికలకుం బ్రియుఁడై విహరించె వేడుకన్.
| 146
|
| తే. |
బుద్ధరూపంబు దాల్చి యంభోజనాభుఁ | డసురవీరుల మోహాబ్ధియందు ముంచె;
భావికాలంబునకుఁ గల్కిభావ మంది | ఖలజనంబుల మర్ధింపఁగలఁడు శౌరి.
| 147
|
- ↑ మున్నిచ్చి - త
- ↑ ముచిత్ర - త; పవిత్ర - క
- ↑ నేఁగి - మా,తి,ర
- ↑ విడిచి - అన్ని ప్ర.
- ↑ వితత - మ,మా,త
