పుట:వరాహపురాణము (హరిభట్టు).pdf/221

చతుర్థాశ్వాసము

125

ఉ.⁠

ప్రేయసిఁ జేరఁదీసి, రతిభేదములం గరఁగింప, నాసరో జాయత[1]నేత్ర గర్భపుటమం దుదయించిరి విష్ణుభక్తిపా రాయణులుం, బ్రశాంతులు, నిరంతరధర్మవిశుద్ధ[2]బుద్ధు, లా మ్నాయపదానువర్తులు ననం దగు దేవవరుల్ క్రమంబునన్.

⁠ 72

క.⁠

వారలఁ ద్రిజగద్విభుఁ డం | భోరుహలోచనుఁడు నాకభువనమునం దిం పారఁ బ్రతిష్ఠించె, దయా | పూరితహృదయారవిందభూషితుఁ డగుచున్.

⁠ 73

దైత్యుల జన్మక్రమము

చ.⁠

పదపడి కశ్యపాహ్వయుఁడు బంధురమోహభరాంధచిత్తుఁడై మదనరసాతిరేకమున మానవతిన్, దితిఁ బుష్పిణిన్, సుఖ ప్రదరతిఁ గూడ, దానియుదరంబునఁ బుట్టిరి యాతతాయు, లు న్మదులు, హరిద్విషుల్, నిగమ[3]నాశకకృత్యులు, దేవశాత్రవుల్.

⁠ 74

క.⁠

హరి, నిజసేవాపరులగు | సురలకు విద్వేషు లగుచుఁ జూపోపని యా దురితాత్ముల, దితిపుత్రులఁ, | బరిమార్చుచునుండుఁ ద్రిదశపాలనమునకై.

⁠ 75

క.⁠

[4]హరికిన్ దేహము సుర, లా ! సురలకు నెగ్గాచరింపఁ జూచినయేనిన్, హరుఁడైనను విమతుం డా | హరికిం, దత్త్వార్థ మిది మహామునితిలకా!

⁠ 76

ఉ.⁠

పంకజనాభుఁ డాత్మపదభక్తుల కాపద వచ్చెనేని యా యంకిలి దీర్చి కాచు, సకలార్థములన్ ఫలియింపఁజేయు, నే వంక జయంబ యిచ్చు, మునివల్లభ! సజ్జనరక్షకై నిరా తంకమతి న్వహింపఁడె యతండు ఝషప్రముఖావతారముల్?

⁠ 77

1. నేత్రి - అన్ని తాళపత్ర ప్ర.
2. బంధు - మ, తి, తీ,హ,ర,క
3. నాశరతుల్ పరతుల్ సురాహితుల్ - తా; సాదరకృత్యులు దేవశాత్రవుల్ (యతి?) - మ; మానులు పాపరతుల్ సురాహితుల్ - మా, త; మానులు వారపతుల్ సురాహితుల్ - తి తీ,హ, ర; దూరులు దారపతుల్ సురాహితుల్ - క
4. హరిదేహంబులు సురలా - మ,మా,త, తా, తి, హ,ర ,క