పుట:వరాహపురాణము (హరిభట్టు).pdf/185

తృతీయాశ్వాసము

87

శా.⁠

[1]యాదృగ్జంతువు గర్భకోటరము మున్నర్థిం బ్రవేశించి, తాఁ దాదృగ్గాత్రభరంబు దాల్చి వెడలుం దద్యోనిమార్గంబునన్, బ్రాదుర్భావనిదానభూరిజవశుంభత్సూతివాతచ్చటా భేదోత్పాదితవేదనాభరమహాభీతిం బ్రకంపించుచున్.

⁠ 144

ఉ.⁠

ఈగతి జీవుఁ డెంతయును హేయతరంబగు మాతృగర్భకా రాగృహవీథి వెల్వడి, నిరంతరబాహ్యసమీరణాహతిం బ్రాగవబోధము న్మఱచి, బాలకుఁడై చరియించి, యౌవనా భోగముఁ జెంది, రూపబలభోగధనాదులచేత మత్తుఁడై.

⁠ 145

క.⁠

గురుదేవద్విజనిందా | పరుఁడై, నిమిషమును విష్ణుపాదాంభోజ స్మరణ మొనర్పఁగ నేరక | తిరుగం జనుచుండు దుర్గతికి జడమతియై.

⁠ 146

సీ.⁠

ఈరీతి నరులు దేహేంద్రియసంజాత | కామాదిగుణములఁ గట్టువడుచు, బహువిధజన్మసంభావితకర్మాను | రూపసంపన్మదారూఢు లగుచు, నర్థదారాదిమోహవ్యాప్తి నస్థిరం | బగు జీవనంబు నిత్యమని నమ్మి, విపులలోభమ్మున విత్త ముపార్జించి | సత్పాత్రదానంబు జరుపలేక,

⁠

తే.⁠

ముక్తిసంప్రాప్తికరధర్మమోదశూన్యు | లగుచు, నటమీఁద బహువేదనాతినిబిడ యాతనాదేహములు దాల్చి, యమితదుఃఖ | మనుభవింతురు నరకకూపాంతరముల.

⁠ 147

వ.⁠

అది గావున.

⁠ 148

సీ.⁠

త్వఙ్మాంససంధిబంధముల పట్టువదల్చి, | దంతకోరకముల ధరణిఁ గూల్చి, నేత్రవీక్షణశక్తి నిశ్శేషముగఁ ద్రించి, | శ్రవణప్రభావంబు సంహరించి, జిహ్వావచోవృత్తి శిథిలత నొందించి, | ఘ్రాణగంధజ్ఞానగరి[2]మ డించి, హృదయసామర్థ్యంబు మొదలికిఁ బోకార్చి, | తనువుఁగంపమునకు దాపొనర్చి,

⁠

తే.⁠

పలితరోగాదివికృతిసంవలితుఁ జేసి | ఘనజరాకాళరాత్రి మ్రింగకయమున్న, నరుఁడు హరి[3]నామజపకళానిరతుఁ డగుచుఁ | బరమపదసౌఖ్య మనుభవింపంగవలయు.

⁠ 149

వ.⁠

అని చెప్పి, వెండియుం బుండరీకభవుండు నారదున కిట్లనియె.

⁠ 150

1. ఈ ప. మ,తి,తీ,హ,ర,క ప్ర.లో లుప్తము
2. మడంచి - తి,హ,ర
3. జపసత్కళా - మ,తా,హ,ర,క; జపసత్కథా - తి