పుట:వరాహపురాణము (హరిభట్టు).pdf/184

86

వరాహపురాణము

క.⁠

హరిమూర్తులలో నెయ్యది | పరిచితమగు, నట్టిమూర్తి భావింపఁదగున్, బరమూర్తిఁ దలఁచెనేనియుఁ | బురుషుఁడు విఘ్నములఁ బొందు, బుద్ధి చలింపన్.

⁠ 137

క.⁠

హరి[1]కీర్తనమాత్రమునం | బరమపదం [2]బొదవు ననుచు బలభిన్ముఖ్యా మరులు మదిఁ గోరుచుందురు | ధరపైఁ గలియుగమునందుఁ దారు జనింపన్.

⁠ 138

ఉ.⁠

దారకుమారమిత్రజనతాఫణిసంకుల, మవ్యయస్పృహా భూరితరాంధకారమధుపుంజతృణావరణంబునైన సం సారపురాణకూపమున జాఱినమర్త్యుఁడు, విష్ణుకీర్తనో దారసురజ్జుమార్గమునఁ దా వెడలం దగు బుద్ధిమంతుఁడై.

⁠ 139

సీ.⁠

నిజ[3]పూర్వభవకర్మనియత[4]యోనిసహస్ర | జాతుఁడై జీవుండు భూతధాత్రి గ్రమమున మానవాకారుఁడై యుదయించి, | పరమవైష్ణవమార్గ మెఱుఁగలేక, పరసతీవ్యసనుఁడై పరవిత్తహరణంబు | సేయుచు, విద్యావిశిష్టులైన బుధుల నిందింపుచుఁ బుణ్యంబు దిగనాడి, | దానం బొనర్పక ధర్మ ముడిగి,

⁠

తే.⁠

గురుకృపాదృష్టిదూరుఁడై కుమతి యగుచు | నర్థకాంతాసుతాదిమోహంబుకతనఁ జాల గర్వించి, యవసానకాలమునను ! యాతనాదేహియై పోయి యమపురమున.

⁠ 140

సీ.⁠

తప్యమానానలతప్తుఁడై, యసిపత్ర | వనఖండితాంగుఁడై శునకవక్త్ర కబళితుండై , గృధ్రకాకసందష్టుఁడై, | లోహానంబులలోనఁ గూలి, యతితప్తతైలమధ్యమునఁ ద్రోవఁగఁబడి | బహుకాలపాశనిబద్ధుఁ డగుచు [5]నధికదుఃఖకరంబు లైన నారకములఁ | దద్గతజంతుబృందములచేతఁ

⁠

తే.⁠

బీడితుండయి, యత్యంతభీతిఁ బొంది, | దండధరభటగదశతధావిభిన్న [6]మూర్ధుఁడై శోకజలధిలో మునిఁగి మునిగి, | [7]యనదయై దిక్కుగానక పనవి పనవి.

⁠ 141

క.⁠

ఈరీతి సకలభయదమ | హారౌరవరౌరవాదికానేకోద్య న్నారకకూపాంతరముల | దారుణబాధా[8]విశీర్ణతరవిగ్రహుఁడై.

⁠ 142

క.⁠

[9]అంతట నిజకర్ణానుభ | వాంతంబునఁ దత్ప్రతిష్ఠమగు గర్భగుహా భ్యంతరముఁ జొచ్చి జననీ | సంతతవిణ్మూత్రవిహిత[10]సర్వాంగుండై.

⁠ 143

1. చింతన - తీ
2. బబ్బు - మా,త
3. యోగ - తీ
4. యోగ - మ,తి,తీ,హ,ర,క
5. నధిక - నారకముల తి,హ,ర, ప్ర. లో లుప్తము; రక్తమేదోమాంససిక్తకూపంబున దుర్గంధమగ్నుఁడై దొర్లి దొర్లి తద్గతంబగుజంతు - తీ
6. మూర్ఖుఁడై - అన్ని ప్ర.
7. ఈ పాదము తా.ప్ర.లో మాత్రమున్నది.
8. వికీర్ణ - త; వితీర్ణ - క
9. ఈ ప. ఆ.ప్ర. లో లుప్తము
10. సర్వాంగకుఁడై - మా