చ. |
ఇట విను మింక నొక్కటి సురేశ్వర! నిక్క ముపన్యసింతు, ధూ
ర్జటివరమత్తులైన దితిసంభవు లేమియుఁ గన్నుగాన, రీ
[1]కుటిలుల సంహరింప మనకుం గల దిక్కు సరోజనాభుఁ, డా
పటుమతి నాశ్రయించు, మన జయశుభోన్నతు లబ్బు గొబ్బునన్.
| 97
|
క. |
పూజింపుము హరిచరణాం | భోజంబుల, నతని[2]రూపమును జిత్తములో
యోజింపుము, తద్గుణగణ | తేజోగరిమములు సన్నుతింపుము భక్తిన్.
| 98
|
క. |
ఆపన్నరక్షకుండగు | నాపన్నగశాయి దుష్టహరణోచితకా
ర్యోపాయకుశలుఁ డవ్యయుఁ | డాపదలన్నియును మాన్చు నాత్మఁ దలంపన్.
| 99
|
ఉ. |
కీర్తనమాత్రసాధుజనభేదము మాన్ప ఝషాదివిస్ఫుర
న్మూర్తులు దాల్చి, దైత్యకలము న్నిజహస్తనిశాతచక్రవి
స్ఫూర్తికి విందుచేసి, పరిపూర్ణయశోనిధియైన భక్తలో
కార్తివిదారి, శౌరి, దిగనాడుె దేవమునీంద్రసంఘమున్?
| 100
|
క. |
వనితారూపముఁ గైకొని | దనుజుల నణఁగించి, యమృతదానంబున నీ
యనిమిషులనెల్లఁ బ్రోచిన | యనుపమచారిత్రుఁ [3]డాప్తుఁ డతఁడే కాఁడే?
| 101
|
వ. |
అని యివ్విధంబునం బరమార్థంబు తేటపడంబలికిన వాచస్పతికి వాస్తోష్పతి యిట్లనియె.
| 102
|
మ. |
అమృతాంభోనిధిలోన శేషఫణిశయ్యామధ్యమం దిందిరా
రమణీరత్నముతోడఁగూడి సుఖనిద్రం బొందియున్నట్టి శౌ
రి మురారి న్నిగమాంతవర్తి మరుకీర్తిం గొల్చుటె ట్లాప్రదే
శము చేరంజనలేరు బ్రహ్మ[4]ముఖులున్, శక్తాత్ములే మాదృశుల్?
| 103
|
క. |
అని హరిపూజాలాభ | మ్మునకు నుపాయంబు వేఁడు పురుహూతుని వా
గ్వినయముల కలరి సురగురుఁ | డనుకంపితహృదయుఁ డగుచు నపు డి ట్లనియెన్.
| 104
|
పుండరీకాక్షుని పూజావిధానము
క. |
నీ నొడివినట్ల యమృతాం | భోనిధిమధ్యమున శేషభోగీంద్రునిపై
శ్రీ[5]నారీయుతుఁడై హరి | తా నెంతయుఁ గూర్మినుండుఁ దథ్యం బరయన్.
| 105
|
- ↑ కుటిలుర - మ;మా;తి,తీ,హ,ర
- ↑ రూపుమొగి - మ,మా,హ,క,ర; రూపమొగి - తి,తీ
- ↑ డాత్ముఁ డాతఁడె - మ,తా; డా మహాత్ముఁడు - త, మా
- ↑ ముఖరుల్ - తా
- ↑ నాయకుఁడై శ్రీ - తి,తీ,హ,ర,క