పుట:వరాహపురాణము (హరిభట్టు).pdf/108

10

వరాహపురాణము

⁠

నయోధ్యానగరంబు మాడ్కి రామ[1]లక్ష్మణాధిష్ఠితంబును, సురలోకంబు కరణి సుమన స్సంవృతంబును, వారాంగనాసదనంబు క్రియఁ బల్లవాస్పదంబును నై, సజ్జనసమాకీర్ణం బయ్యుఁ బుణ్యజనదూరంబును, వివిధశాలాన్వితం బయ్యు విశాలంబు నగు రోమశాశ్రమంబుఁ గనుం గొని [2]ప్రవేశించి యందు.

⁠ 3

మ.⁠

కనియెన్ సంయమిసార్వభౌముఁడు త్రిలోకఖ్యాతభాస్వద్యశున్, దిననాథప్రతిమానమూర్తి సుషమా[3]దీప్తాఖిలక్ష్మాదిశున్, ఘనపంచేంద్రియమత్తవారణఘటాగర్వాపహారాంకుశున్, వినుతామ్నాయపురాణతత్త్వకలనావిద్యావశున్, రోమశున్.

⁠ 4

మ.⁠

కని చేర న్మునియుక్తుఁడై యరిగి మార్కండేయమౌనీంద్రుఁ డా [4]ఘను, నిందూపలవేదికాస్థితు, నమస్కారప్రియాలాపసం జనితానందునిఁ జేసి, [5]సత్కృతసమర్చాపూర్వకాతిథ్యముల్ గొని, తత్ప్రాంతసమర్పితాసనమునన్ [6]గూర్చుండె మోదంబునన్.

⁠ 5

వ.⁠

ఇట్లు భాగవతకులాగ్రగణ్యుండును, బరమపుణ్యుండును, మహానుభావుండును నగు మార్కండేయమహామునిదేవుం డుపవిష్టుండగుటయుఁ దత్ప్రభావంబున.

⁠ 6

ప్రశాంతపావనవనశోభ

సీ.⁠

ఋతుధర్మములు మాని లతలు భూజంబులు | పూచి కాచి ఫలించి పొలుపు మిగిలె, నంబుధరాలోకనంబు లేక మయూర | విహగసంఘము పురి విచ్చి యాడెఁ, బుంస్కోకిలంబు లపూర్వకుహూకార | పంచమ[7]స్వరముల పసలు చూపె, శ్రుతిసుఖస్వరముల శుకశారికాతతి | హరికథామృతముల నానుచుండెఁ,

⁠

తే.⁠

దేనియలు గ్రోలి [8]మదమునఁ దేఁటిగములు | సారఝంకారరవముల సంభ్రమించె, మఱియుఁ దక్కిన జంతుసమాజమెల్ల | నురుతరానందజలరాశి నోలలాడె.

⁠ 7

మ.⁠

వనలక్ష్మీధవళాతపత్రములఠేవం బుండరీకావళుల్ గనుపట్టెన్ వికసించి కాంతిగరిమం గాసారమధ్యంబునన్, ఘనపుష్పోత్థితరేణుపింజరితరంగత్తారకా[9]వీథి త ద్వనజాతాక్షికి మేలుకట్టుగతి హృద్యంబయ్యె నీక్షింపఁగన్.

⁠ 8

1. లక్ష్మణాధిదైవతంబును - తా
2. ప్రశంసించి - తీ
3. ధిక్షాఖిలక్ష్మాధిశుం - మ; దీప్తాఖిలక్ష్మాధిశుం - మా; దీప్తాఖిలక్ష్మాధిపున్ - త; దిశ్శాఖిలక్షాధిశున్ - తీ; దిక్ష్మాఖిలక్షాధిశున్ - ర; దిక్ష్మాఖీలాధీశున్ - క
4. ఘనసింధూఫల - మ, తా, హ, ర, క
5. తత్కృత- మా
6. గూర్చుండి - త, తి
7. స్వనముల - త, తా,హ,ర, క
8. మదనుని - తి, తీ
9. రీతి - మ